DGMT Viqueque rekolla reseita $2,815.52 ba kofre Estadu
VIQUEQUE, 07 fevereiru 2024 (TATOLI)-Diretór Diresaun Jestaun Merkadu no Turiszmu (DGMT) iha munisípiu Viqueque, Estevão de Carvalho, informa, iha tinan 2023 DJMT munisípiu Viqueque konsege rekolla reseita $2,815.52 hodi hatama ba kofre Estadu.
“Hahú husi fulan janeiru to’o dezembru 2023, ami konsege rekolla reseita hamutuk $2,815.52, reseita ida-ne’e mai husi públisidade ne’ebé maka ita-nia empreza sira monta publisitáriu sira iha Viqueque ”, hatete Estevão de Carvalho, ba Agência TATOLI,I.P, iha ninia kna’ar fatin, administrasaun munisípiu Viqueque, ohin.
Enkuantu, iha tinan 2022, DJMT Viqueque arrekada purvolta $1.783,94 ba kofre Estadu.
“Diresaun ida-ne’e ami haree liu ba públisitariu atu hetan taxa ami tenke tuun ba kampu hodi halo asismentu ba empreza sira-ne’ebé taka sira públistáriu iha atividade komersiu nian. Iha munisípiu Viqueque empreza sira-ne’ebé selu ativu maka hanesan Timor Telekom (TT), Telemor no Telekomcel tanba kada fulan sira kumpri sira dever hodi selu taxa ba Estadu, enkuantu loja sira munisípiu Viqueque hatene ona, maibé sira laiha públisidade”, nia afirma.
Bá tinan 2024 ne’e, nia akresenta hahú janeiru tama fulan fevereiru, maibé DJMT seidauk halo atividade tanba kestaun orsamentu no rekursu ne’ebé menus liu.
“Tinan 2024 husi janeiru agora tama fulan fevereiru ha’u la halo atividade ruma tanba funsionáriu na’in-rua, maibé sira kontratu hotu la kontinua servisu, nune’e agora hela ha’u mesak. Maske ha’u mesak, maibé ha’u sei esforsu hodi la’o ba oin, ita rekursu laiha ne’ebé nonook de’it iha fatin ida-ne’e ladun di’ak”, katak nia.
Tanba ne’e, nia husu ba Governu atu bele rezolve asuntu orsamentu no rekursu umanu hodi bele serbisu ho di’ak liután.
Jornalista: Vitorino Lopes da Costa
Editór : Florencio Miranda Ximenes
