DPL Viqueque halo lelaun ba veíkulu patrimóniu Estadu unidade 42
VIQUEQUE, 07 fevereiru 2024 (TATOLI)— Diresaun Patrimóniu no Lojístika (DPL) munisípiu Viqueque, Filomeno da Cruz, informa, daudaun halo hela loke konkursu públiku no internal ba lelaun veíkulu Estadu hamutuk unidade 42.
“Prosesu lelaun ba patrimóniu Estadu ne’ebé halo lelaun mak hanesan karreta unidade tolu no motorizada unidade 39. Daudaun iha ona prosesu avaliasaun ikus no iha semana ida-ne’e nian laran ami sei fó sai rezultadu ba prosesu lelaun nian”, hateten Filomeno da Cruz, ba Agência TATOLI,I.P, iha resintu administrasaun Viqueque, ohin.
Karreta sira ne’ebé halo lelaun mak trasnporte sira ne’ebé administradór sira uza hanesan Uatucarbau, Ossu no Viqueque Vila.
Antes ne’e, nia dehan hatama proposta ba lelaun veíkulu sira iha munisípiu Viqueque motorizada hamutuk unidade 80, maibé iha prosesu avaliasaun ikus ne’e identifika motorizada unidade 39 mak submete ba partimóniu.
Tuir planu prosesu lelaun ba veíkulu sei loke fali iha fulan marsu 2024, nune’e husu utilizadór veíkulu patrimóniu estadu sira-ne’ebé uza bele submete atu partisipa iha ba konkursu lelaun.
“Fulan-oin loke tan fali lelaun, ami sei halo identfika ba veíkulu sira-ne’ebé prazu liu no kilometrazen liu sei submete hotu ba patrimóniu hodi halo lelaun”, nia hato’o.
Alende ne’e, nia afirma halo mós identifikasaun no prosesa ona motorizada sira-ne’ebé xefe suku tuan sira uza hodi muda nia-xapa matríkula ba privada hodi xefe suku sesante sira uza.
“Ami hahú prepara ona karta koñesementu atu hato’o ba xefe suku sira hamutuk 36 no atu lori sira nia motorizada mai iha Diresaun Transporte Terrestre hodi halo transferénsia ba xapa matríkula ba privada”, nia konklui.
Jornalista : Vitorino Lopes da Costa
Editór : Florencio Miranda Ximenes
