iklan

INTERNASIONÁL, JUSTISA, DILI, HEADLINE

PR Horta: Governu tenke halo validasaun ba pasaporte to’o tinan 10

PR Horta: Governu tenke halo validasaun ba pasaporte to’o tinan 10

Prezidente Repúblika, José Ramos Horta. Imajen Tatoli/Egas Cristóvão

DILI, 07 fevereiru 2024 (TATOLI) – Prezidente Republika, José Ramos Horta, husu ba Governu liuliu Ministériu Justisa atu tau data validade ba pasaporte labele tinan lima, maibé tenke to’o tinan sanolu (10).

“Governu tenke tau nia prazu ba passaporte tenke to’o tinan 10, labele tinan lima, sé tau tinan lima ne’e impaktu tebes ba estudante sira ne’ebé estuda iha rai li’ur no ema sira hala’o atividade iha rai li’ur ne’e,” dehan PR Horta ba jornalista sira iha Aeroportu Internasionál Prezidente Nicolau Lobato, kuarta ne’e.

Xefe Estadu fó ezemplu, bainhira data validade passaporte to’o tinan lima impaktu maka’as ba estudante timoroan sira tanba durante tinan tomak sira trata visa estudante bainhira visa sai passaporte hela de’it ona tinan tolu atu data validasaun ramata no imigrasaun lakohi atu taka visa no estudante sira mak sai vitima.

Nune’e, Xefe Estadu husu ba Governu atu haree ba kestaun ho didi’ak hodi halo mudansa ba data validade passaporte no no Billete Identidade.

Fasilita pasaporte ba Timor-oan iha rai-liur

Prezidente Repúblika mós husu ba Ministériu Justisa atu estabelese mákina modernu kona-bá produsaun passaporte nian iha Embaixada Timor-Leste nian iha Austrália, Korea Súl no Inglaterra ka Reinu Unidu, nune’e bele fasilita timoroan sira ne’ebé pasaporte mate bele renova.

“Ha’u ko’alia ona ho Ministériu Justisa, kada tinan timoroan sira iha rai li’ur hanesan, Austrália, Korea Súl no Inglatera sempre hatama osan mai, ita osan iha passaporte iha ona, nusa ita la tau mákina tarata passaporte iha kada Embaxada atu fasilita halo emisaun passaporte ba timoroan sira ne’ebé nia pasaporte mate, ba oin Governu tenke halo no ha’u kontinua ezije nafatin,” Horta sujere.

Tuir dadus ne’ebé Xefe Estadu hetan timoroan sira hosi Inglaterra iha tinan kotuk hatama osan mai Timor-Leste hamutuk millaun $110.

Ho nune’e nia lakoi Ministeriu Justisa halerik osan laiha atu prepara mákina trata pasaporte ba nasaun tolu ne’ebé timoroan hela barak.

Notísia relevante: PR Horta fila hikas ona mai TL hafoin vizita nasaun tolu iha Europa

Jornalista  : Hortencio Sanchez

Editór         : Florencio Miranda Ximenes

iklan
iklan

Leave a Reply

iklan
error: Content is protected !!