VIQUEQUE, 07 fevereiru 2024 (TATOLI)– Koordenadór Bee Timor Leste, Empreza Públika (BTL,EP), Marito da Costa, informa, progresu projetu melloramentu sistema bee-moos ba abitante sira iha postu administrativu Ossu ne’ebé implementa iha tinan 2022 , daudaun atinje ona 50%.
“Ita nia projetu ne’e rasik sei finiliza iha tinan 2024, atu nune’e abitante sira bele asesu ba bee-moos ho susesu”, Marito da Costa, hatete ba Agência TATOLI.IP, iha ninia kna’ar fatin, kuarta ne’e.
Projetu melloramentu sistema bee-moos hosi BTL, E.P iha postu Ossu iha projetu rua hanesan halo kanalizasaun no seluk maka kontrusaun tanke rezervatóriu sira ne’ebé utiliza rekursu bee-matan husi foho Mundu Perdidu nia leten.
“Ba kontrusaun tanke rezervatóriu bee-moos tama faze final ona no progresu kanalizasaun daudaun ne’e sei kontinua la’o. Ami BTL,EP sei akompaña nafatin projetu ida-ne’e bainhira ramata mak ita bele hahú distribui ka kanaliza bee-moos ba ita-nia abitante sira”, nia promete
Projetu ne’e hosi BTL,E.P ne’ebé implementa iha fulan-marsu-2022, iha munisípiu Viqueque iha postu administrativu Ossu ho empreza responsavél projetu mak CDFG Unipessoal Lda.
Iha kontratu ne’e, Empreza harii tanke foun tolu, reabilita tanke tolu no dada kanu hosi bee matan ba Ossu Vila, ho kustu $421.903,57. Projetu ne’e sei fó benefísia ba populasaun 2.850 hosi uma-kain 475 ne’ebé pertense iha postu administrativu Ossu.
Jornalista : Vitorino Lopes da Costa
Editór : Florencio Miranda Ximenes
