VIQUEQUE, 08 fevereiru 2024 (TATOLI)— Governu liuhusi Ministériu Edukasaun (ME) hamutuk Governu Austrália, kinta ne’e, lansa programa Apoiu Lideransa liuhosi Mentoria no Apredijazen (ALMA) ba afze da-sanolu iha Ensinu Báziku Central (EBC-sigla portugés) 12 Uani Uma, postu adiministrativu Uatucarbau, munisípiu Viqueque.
Objetivu ba programa ALMA atu hasa’e prestasaun servisu lideransa eskola sira-nian tanba hakarak hasa’e kualidade edukasaun iha Timor Leste.
“Ita lansa programa ne’e ba tama ona faze 10 no programa ne’e kompleta ona kobre ba eskola EBC no EBF sira iha munisípiu tomak. Austrália-nia sistema ne’e parseria ho Ministériu Edukasaun antes ne’e implementa iha munisípiu 10. Foin lalais Ministériu Edukasaun lansa tán ba munisípiu tolu Ermera, Ainaru no Oé-cusse ne’ebé liuhusi projetu Haforsa Transformasaun Edukasaun Bázika. Tan ne’e programa ALMA kobre hotu ona eskola sira iha territóriu Timor Leste”, hatete Reprezentante Embaixadór Austrália atuál Xefe ekipa Edukasun Parseira ba Dezenvolvimentu Umanu (PHD), Esther Correia, iha Uatucarbau.
Governu Austrália iha komitementu bo’ot ne’ebé hakarak servisu besik liu ho ME hodi reforsa sistema edukasaun no mellora prosesu apredijazen iha Timor Leste.
“Ha’u husu mentór sira kontinua servisu di’ak ho ita-nia lideransa eskola tanba ita mai la’ós hanorin lidér eskola sira, maibé ita mai aprende hamutuk ho lidér eskola sira”. nia sujere.
Iha fatin hanesan, Reprezentante Ministériu Edukasaun, Apolinário Serpa Rosa, afirma ba implementasaun programa ALMA mai husi Ministériu Edukasaun ne’ebé hetan apoia husi Governu Austrária liuhusi PHD atu fó apoiu ba lidernsa eskola sira hodi halo monitorin no akompanamentu ba prosesu apredijazen.
Programa ALMA ne’e, nia akresenta envolve mentór sira iha territóriu Timor Leste na’in-131 ne’ebé maka sei akompaña lideransa eskola sira.
“Ha’u husu lideransa eskola sira tenke servisu hamutuk ho mentór sira no tenke kolabora malu hodi tulun sira ba prosesu apredijazen bainhira iha sala aula-laran”, katak.
Husu mós ba Administradór postu lima iha munisípiu Viqueque nu’udar lider ba kada postu tenke tau matan mós ba lider eskola no kontrola professor sira tanba prosesu apredijazen la’o di’ak ema hotu-hotu tenke tau matan.
Edukasaun munisipál agradese
Diretór Servisu Edukasaun Viqueque, Domingos Brandão, sente kontente no agradese tanba ho programa ALMA ne’e ajuda lideransa eskola EBC no servisu edukasaun Viqueque bele mellora no garante kualidade.
“Ami haree katak prezensa programa ALMA iha munisípiu Viqueque sei ajuda ita-nia lideransa sira iha eskola hodi haree ba kualidade edukasaun iha Viqueque,” nia afirma.
Tuir dadús eskola EBC hamutuk 18 no Ensinu Báziku Filiál (EBF) hamutuk 77 ne’ebé maka eziste iha munisípiu Viqueque.
Entretantu, Diretór EBC 12 Uani Uma, Tomas da Cruz, mós agradese tanba programa ALMA, nune’e prontu kolabora ho mentór sira atu ajuda eleva prosesu apredijazen.
“Ha’u sente kontente ba implementasaun programa ALMA ne’e, tanba ajuda ami Eleva koñesementu, nune’e ami sei kolabora ho mentór sira, atu ami bele hadi’a kualidade apredijazen sira-ne’ebé hala’o iha ami-nia eskola ida-ne’e”, nia kompromete.
Tuir dadús EBC 12 Uani Uma ho totál estudante primeiru siklu 1 to’o terseiru 3 hamutuk 510 no profesór na’in-21, maibé profesór ativu na’in-10.
Iha ámbitu lasamentu programa ne’e, ME no reprezentante Embaixada Austrália iha Timor Leste distribui direta tableta hamutuk unidade 5 ba Diretór EBC sira husi postu administrativu lima hanesan Viqueque Vila, Uatucarbau, Uatulari, Lacluta no Ossu.
Jornalista: Vitorino Lopes da Costa
Editór : Florencio Miranda Ximenes
