iklan

JUSTISA, HEADLINE

MJ: “Servi sidadaun ho di’ak no fó satisfasaun ba sira”

MJ: “Servi sidadaun ho di’ak no fó satisfasaun ba sira”

Sidadaun sira halo konfirmasaun ba prosesu tratamentu Pasaporte iha Diresaun Nasionál Rejistu no Notariadu (DNRN), Minisétriu Justisa (MJ), kuarta (03/01/2024). Imajen Tatoli/ Francisco Sony

DILI, 08 fevereiru 2024 (TATOLI) – Ministru Justisa En-Ezersísiu, Paulo Remediós nota katak servisu atendimentu iha Diresaun Jerál Servisu Rejistu Notariadu (DGSRN), Ministériu Justisa (MJ) seidauk másimu tanba funsionáriu sira menus formasaun oinsá atu halo atendimentu ba públiku ho didi’ak.

“Dala barak sidadaun sira ba trata Pasaporte ka BI iha Notariadu funsionáriu sira atende ho karakter ladún di’ak ida ne’e ita rekoñese duni, tanba ita-nia funsionáriu sira menus formasaun. No, situasaun ida ne’e Primeiru-ministu fó ona orientasaun ba ha’u atu haree ida ne’e, nune’e futuru labele akontese, hanesan servidór tenke servi ita-nia sidadaun ho di’ak fó satisfasaun ba sira liuhosi ita-nia atendimentu,” Paulo Remediós hateten ba TATOLI iha nia kna’ar fatin MJ Colmera, kinta ohin.

Ministru Justisa En-Ezersísiu mós rekoñese, DGSRN sei menus ekipamentu liuliu laiha ar kondisionadu (AC) no mákina imprime Billete Identidade (BI) avaria.

“Ha’u iha sesta semana kotuk halo vizita ida ba iha Diresaun Jerál Servisu Rejistu Notariadu iha vizita ne’e buat ne’ebé mak ha’u identifika sai hanesan problema iha Diresaun Rejistu Notariadu Servisu mak fasilidade liuliu komputadór barak mak avaria inklui mákina ba imprensaun BI avaria nune’e mós ar kondisionadu iha sala balun iha ne’ebá mós avari totál,” Paulo Remediós hateten.

Nia dehan, komputadór sira iha sala imprensaun BI iha tolu mak avaria ona tanba AC iha fatin la funsiona, entaun hakarak ka lakohi ekipamentu sira ne’e tenke avaria tanba komputadór sira ne’e presiza malirin hela de’it; labele manas, kuandu AC komputadór no mákina imprensaun BI tenke avaria.

Governante ne’e dehan, haree ba situasaun ne’ebé mak akontese iha Notariadu mak hanesan Ministru Justisa en-ezersísiu lori kedan Kaderneta Pasaporte 15.920 lori ba rai iha edifisiu Polísia Sientífika Investigasaun Kriminál atu asegura didi’ak.

“Ita lori Pasaporte 15.920 mai asegura iha PCIC nian fatin tanba kodisaun iha Notariadu la permite; AC laiha entaun ita tenke lori mai rai iha PCIC. Ita-bo’ot sira foin daudaun akompaña ha’u hodi ba halo inspensaun ba kaderneta Pasaporte 15.920 ita haree PCIC nia fatin asegura kaderneta Pasaporte ita tama laran malirin no temperatura kontroladu,” nia informa.

Paulo hateten, sasan hanesan Kaderneta Pasaporte tenke preserva no asegura halo didi’ak fatin ne’ebé rai ba ne’e mós nia temperatura tenke kontrola hodi labele estraga sasan Estadu nian ne’e.

Nia dehan, kaderneta Pasaporte labele rai iha Notariadu tanba ar kondisionadu mós laiha, bele estraga kaderneta Pasaporte.

“Hafoin ha’u halo tiha vizita ba Notariadu ha’u rasik ho voluntáriu apoiu ha’u-nia vintuña ba iha ne’ebá,” nia adianta.

Tanba ne’e, Governante ne’e husu ona ba Diretór Jerál Servisu Rejistu Notariadu atu halo pedidu mai iha Ministériu Justisa hodi MJ bele responde lalais kestaun sira ne’e.

“Durante ne’e Notariadu enfrenta problema ba fasilidade sira la fó hateten no sira mós la halo pedidu mai. Agora ha’u husu ona ba sira tenke halo pedidu mai para ita bele problema ne’ebé agora Notariadu enfrenta,” nia fó-hanoin.

 

Notísia relevante:Atendimentu ajenda online iha MJ funsiona iha 29 janeiru

Jornalista: Natalino Costa

Editór: Rafael Ximenes de A. Belo

 

iklan
iklan

Leave a Reply

iklan
error: Content is protected !!