DILI, 08 fevereiru 2024 (TATOLI) – Sekretaria Estadu Komunikasaun Sosiál (SEKOMS) selebra ona kontratu ho órgaun komunikasaun sosiál hamutuk 14 hodi divulga informasaun ba munisípiu to’o suku sira, liuhusi distribuisaun jornál no programa sira ne’ebé sei publika iha plataforma mídia online.
Akordu ne’e ho nia durasaunn ba fulan 11 ne’ebé sei realiza iha fevereiru ba mídia privada mak hanesan Dili Post, GMN, Gardamor TV, Jornal Independente, Hatutan.Com, Lafaek News, Media Mudansa, Media One Timor, Suara Timor Lorosa’e, Timor Post, TVET, VIP-TV, LABEH TV no SMNews ne’e. Totál orsamentu ne’ebé SEKOMS prevee ba selebrasaun kontratu ho órgaun 14 ne’e ho montante rihun $200.
Sekretáriu Estadu Komunikasaun Sosiál, Expedito Dias Ximenes, hatete molok SEKOMS selebra akordu ho mídia sira ne’e, ekipa husi sekretaria bá halo uluk ona serbisu iha terrenu hodi halo levantamentu dadus.
“Ita-nian ekipa sira ne’e konsidera katak iha kada munisípiu, postu ba to’o suku sira kuaze populasaun barak mak gosta lee no hakarak hatene informasaun kona-ba progresu dezenvolvimentu iha nasaun ne’e. Tanba ne’e, ita deside hodi kontinua halo akordu ho mídia sira hodi apoia fali jornál bá munisipiu sira”, Expedito relata iha ámbitu asina kontratu ho mídia 14, iha salaun Prezidénsia Konsellu Ministru, ohin.
Ba divulgasaun informasaun liuhusi distribuisaun jornál sira ne’e, ekipa SEKOMS mak sei akompaña mídia sira hodi halo kontrolu tanba sei iha serimónia entrega. “Sé mak simu sei asina, nune’e ami bele halo avaliasaun katak levantamentu dadus ne’ebé ami halo ba populasaun sira hetan duni jornál husi kada mídia imprime sira”, dehan.
Kabe ba mídia ho plataforma online sira ne’e, SEKOMS realiza ona Programa Governu Rona ne’ebé prodús direta husi RTTL, GMN ho TVE, inklui produtu ne’ebé SEKOMS rasik prodús maka Programa Haree Rasik ne’ebé fahe ona ba mídia online sira hodi bele públika atu komunidade sira iha munisípiu, postu no suku sira bele akompaña.
“Ne’e programa Nonu Governu nian ne’ebé SEKOMS fó apoiu ba mídia imprime no televizaun privada sira, inklui apoiu mós plataforma online sira ne’ebé maka prienxe ona rekizitu sira atu bele halo diseminasaun ba informasaun asaun governativa”, esplika.
Diretór Timor Post, Jacob Ximenes, apresia SEKOMS ne’ebé selebra fali kontratu ho mídia privada sira ho intensaun atu informasaun sira ne’ebé espalla iha nasaun ne’e bele ba to’o iha munisípiu, postu no suku sira.
Nia dehan hanoin di’ak Governu ida ne’e hodi selebra kontratu ho mídia sira ne’e la signifika atu intevein iha independésia mídia sira-nian, maibé ne’e hanesan meiu ida atu hatutan informasaun ba maluk sira iha área remota hodi bele akompaña prosesu konstrusaun nasaun ida ne’e nian.
“Kontratu ne’e atu reforsa de’it mídia sira hodi hala’o sira-nian knaar ho independente, profisionál no imparsiál, katak mídia sira sei lahalo tuir de’it Governu nia hakarak, tanba sira mós iha ninia polítika redasaun rasik”, ralsa.
Jornalista: Tomé Amado
Editora: Maria Auxiliadora
