iklan

DEFEZA, DILI, HEADLINE

PM Xanana garante seguransa ba vizita Amu Papa Francisco mai Timor-Leste

PM Xanana garante seguransa ba vizita Amu Papa Francisco mai Timor-Leste

Primeiru-ministru, Kay Rala Xanana Gusmão. Imajen Tatoli/Antonio Daciparu

DILI, 08 fevereiru 2024 (TATOLI) – Primeiru Ministru (PM) Kay Rala Xanana Gusmão, informa, daudaun hala’o hela preperasaun hodi garante seguransa ba vizita Amu Papa Fancisco, ne’ebé tuir ajenda sei vizita Timor-Leste iha agostu 2024 ne’e.

Líder Ezekutivu ne’e hato’o prosesu preparasaun iha área seguransa ne’e ba jornalista sira hafoin partisipa iha enkontru Konsellu Superiór Defeza no Seguransa (KSDS) ne’ebé realiza iha Palásiu Prezidensiál Nicolau Lobato, Bairru Pité,Dili, kinta ne’e.

Notísia Relevante: Tinan ne’e, Papa Francisco konfirmadu vizita Timor-Leste

“Ami ko’alia kona-ba oinsá ita nia preparasaun atu simu Amu Papa, komisaun ne’ebé mai hosi Vatikanu ko’alia ona ho komisaun ne’ebé ita nia Governu forma, ne’ebé servisu ita hala’o ona, tanba sei mai iha fulan-agostu, ne’ebé sei iha tempu naruk ba ita hodi halo preparasaun”, hateten  PM Xanana .

Tuir ajenda vizita Santo Padre ne’e sei ba iha haat hanesan Papua Nova-Guinea, Timor Leste, Singapura no Indonézia.

“Tanba ne’e, Xefe Estadu husu ba parte hotu liuliu Governu atu halo preparasaun másimu tanba fulan-maiu ekipa hosi Vatikanu sei mai tan Timor-Leste hodi haree situasaun hotu inklui seguransa,” nia afirma

Durante reuniaun KSDS, PM Xanana dehan ko’alia mos asuntu kona-ba seguransa no defeza , maibé labele atu fó sai ba públiku.

Enkontru KSDS ne’e Prezide hosi Prezidente Repúblika, José Ramos Horta, no partisipa hosi Primeiru-Ministru, Xanana Gusmão, Ministru Defeza, Contra-Almirante, Donaciano Gomes, Ministru Interiór, Francisco Guterres, Ministru Justisa Interinu, Amândio de Sá Benevides, Deputada Maria Terezinha Viegas, Deputadu David Dias Ximenes no Duarte Nunes.

Alende ne’e, Xefe Estadu Maiór Jenerál FALINTIL-Forsa Defeza Timor-Leste, Tenente-Jenerál Falur Rate Laek, Komandante-Jerál Polísia Nasionál Timor-Leste, Komissáriu-Jerál, Henrique da Costa, Diretór-Jerál Servisu Nasionál Inteligênsia, Longuinhos Monteiro, Júlio Tomás Pinto no Nuno Sarmento.

Molok ne’e, Arsebispu Arkidioseze Metropolitana Dili, Don Virgílio Kardeál da Silva do Carmo, SDB, hateten igreja sei hein data fiksu Papa Francisco atu mai vizita Timor-Leste ne’e hosi Vatikanu.

Preparasaun ba Papa Francisco nia vizita ne’e, to’o agora seidauk bele halo tanba sei hein konfirmasaun no bainhira data loos ona mak Governu ho igreja sei halo preparasaun.

Notísia relevante: Papa Francisco vizita TL, Komisaun E observa kondisaun aeroportu Comoro

Jornalista: Hortencio Sanchez

Editór     : Florencio Miranda Ximenes

iklan
iklan

Leave a Reply

iklan
error: Content is protected !!