iklan

JUSTISA, HEADLINE

Semana ne’e, Ekipa notariadu sei arranka ba rai-li’ur renova Pasaporte no BI timoroan sira

Semana ne’e, Ekipa notariadu sei arranka ba rai-li’ur renova Pasaporte no BI timoroan sira

Ministru Justisa em-ezersísiu, Paulo Manuel da S. dos Remédios. Imajen Tatoli/Egas Cristóvão

DILI, 08 fevereiru 2024 (TATOLI)-Ekipa téknika Diresaun Jerál Servisu Rejistu Notariadu, Ministériu Justisa (MJ) sei dezloka ba rai-li’ur hodi halo atendimentu renovasaun Pasaporte no Billete Identidade (BI) ba timoroan sira iha diáspora.

Ministru Justisa en-ezersísiu, Paulo Remedios, informa, ekipa téknika kompostu husi ema na’in rua, iha sábadu (10/02) sei ba halo renovasaun Pasaporte no BI ba diplomata sira, hahú husi adidu no funsionáriu sira ne’ebé serbisu iha Embaxada Reinu Unidu, Uniaun Europeia no Portugal.

“Iha biban ne’e ita mós sei halo atendimentu hodi renova ita-nia sidadaun sira ne’ebé hela iha Inglaterra no Portugal nian Pasaporte no BI,” Paulo Remediós hateten ba TATOLI iha nia kna’ar fatin MJ, Colmera, kinta, ohin.

Notísia relevante:Traballadór timor-oan 867 iha Koreia Súl sei hetan renovasaun pasaporte

Governante ne’e dehan, renovasaun Pasaporte no BI ba adidu no funsionariu Embaixada tolu sei halo de’it iha Emabiaxada de’it la halo iha fatin livre tanba ne’e husu sidadaun sira iha Inglaterra no Portugal ne’ebé atu renova Pasaporte tantu BI atu hakbesik ba iha Emabaixada Portugal, Inglaterra no Uniaun Europeia atu bele renova dokumentu.

Tanba prosesu ne’e, tuir ministru, ekipa tékniku sei kooderna ho Embaxadór Portugal, Inglaterra no Uniaun Europeia atu haree kestaun ne’e.

“Prosesu ne’e sira foti ita naran no selseluk tan ikus mak hasai foto depois sira sei hatama iha sistema lori mai Timor hodi halo imprensaun. Hafoin impresaun, Ministériu Justisa sei kooderna no parte MNEK hodi ko’alia kona-ba oinsá transporta fali dokumentu ne’e ba diáspora,” nia adianta.

Tanba prosesu transporta Pasaporte no BI ba fali rai-li’ur ne’e la’ós naran-naran de’it maibé liuhosi prosesu ida ne’ebé bolu mala diplomátiku signifika Pasaporte no BI sira ne’ebé renova ona ne’e tenke transporte liuhosi mala diplomátika.

Governante ne’e subliña, bainhira dokumentu sira ne’e to’o mai iha Embaixada Inglaterra, Portugal no Uniaun Europeia mak Adidu no funsionáriu sira inklui sidadaun sira iha diáspora bele foti sira-nia dokumentu.

Paulo Remediós hateten, atu destaka permanente funsionáriu Notariadu nasaun sira seluk ne’e Ministériu Justisa sei ko’alia ho Ministériu Negósiu Estranjeiru no Kooperasaun (MNEK) para haree ba oin bele destaka funsionáriu permanente ba Embaixada Timór nian iha rai-li’ur atu bele atende servisu ba sidadaun sira iha diáspora.

 

Notísia relevante:Membru PN husu MJ renova pasaporte timoroan iha Portugál

Jornalista: Natalino Costa

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!