DILI, 09 fevereiru 2024 (TATOLI) – Polísia Tránzitu rejista, iha jeneiru, asidente tráfégu iha territóriu hamutuk 187 no husi akontesimentu ne’e kauza ema na’in-10 lakon vida, na’in-59 kanek todan no 238 kanek kmaan.
Xefe Departamentu Seguransa Rodoviária, Superintende Asistente Polísia Luís da Costa, hatete kazu sira ne’e akontese tanba impaktu husi motorista sira la uza kapasete, la respeita sinál tránzitu, nomós la kontrola kondisaum veíkulu sira.
Husi akontesimentu sira ne’e, Polísia Tránzitu mós submete ona kazu hamutuk 12 ba Ministériu Públiku hodi kanaliza ba Tribunál no seluk sei iha hela prosesu nia laran no balun parte rua entre vítima no suspeitu sira sei tuur hamutuk hodi rezolve tuir família.
“Husu ba motorista sira atu lori transporte sira tenke dixiplina no respeita sinál tránzitu ne’ebé monta ona iha dalan sira, nune’e bele redús asidente tráfiku hodi la fó risku ba ema nia vida”, Asistente Polísia LRuís da Costa apela.
Rekorde katak Polísia Nasionál Timor-Leste, liuhosi Departamentu Tránzitu no Seguransa Rodaviária rejista ona, iha tinan kotuk, asidente tráfegu iha territóriu hamutuk 1.964, no ema na’in-86 mak lakon vida.
Husi asidente hirak ne’e aleinde ema lakon vida, rezulta mós ema na’in-400 kanek todan no 2.333 kanek kmaan. Iha 2022, na’in-110 mak mate.
Notísia relevante: PNTL rejista ema na’in-86 lakon vida iha 2023
Jornalista: Tomé Amado
Editora: Maria Auxiliadora
