iklan

NASIONÁL, EKONOMIA, HEADLINE

Empreza seidauk hala’o atividade peskiza ba mármore iha Manatuto

Empreza seidauk hala’o atividade peskiza ba mármore iha Manatuto

Prezidente ANM, I.P, Rafael Danilson de Araújo. Imajen Tatoli/Jogerjo Guterres.

DILI, 09 fevereiru 2024 (TATOLI)—Empreza responsável ba peskiza mármore iha munisípiu Manatuto seidauk hala’o atividade tanba iha difikuldade balun.

Governu Timor-Leste liuhosi Autoridade Nasionál Petróleu no Minerál (atuál Autoridade Nasionál Petróleu) asina akordu ho empreza rua hanesan Elegant Marble Group unip, Limitada (EMG) no Uma Marble Timor (UMT), iha tinan 2020, hodi halo peskiza ba rekursu naturál mármore iha área ektare 400 ho kustu rihun $600 inklui estudu iha parte norte postu administrativu Laclo, munisípiu Manatuto.

Prezidente Autoridade Nasionál Mineiru, Institutu Públiku (ANM, I.P), Rafael Danilson de Araújo, hateten, akordu ne’e hodi fó biban ba empreza atu halo estudu tékniku ida iha setór minerál hanesan prospesaun no peskiza hodi bele prodús rezultadu hanaran estudu viabilidade.

“Hafoin selebra tiha akordu ho empreza, ami iha faze preparasaun hodi tun ba baze, entaun ita enfrenta tiha COVID-19 no serbisu ne’e paradu tiha kuaze tinan-rua. Foin daudaun mak ita komesa filafali, empreza LMG ne’e nia área konsensaun iha bloku Museu lokaliza iha Behedan no bloku seluk Mauruik-raten lokaliza iha dalan Laclo, ne’ebé bloku rua ne’e lokaliza iha munisípiu Manatuto,” Prezidente ANM informa ba Agência Tatoli, iha ninia knaar fatin, City 8, Manleuana, sesta ne’e.

Notísia relevante :  ANPM no autoridade Manatuto halo serimónia kulturál hodi loke dalan ba peskiza mármore

Nia dehan, bloku Museu to’o agora sei iha hela dezentendimentu oitoan ho komunidade lokál kona-ba fatin kultura, nune’e iha hela diskusaun ho komunidade. Enkuantu, bloku Mauruik-raten ne’e momentu ne’ebá Governu konsege halo tiha serimónia kultura, ne’ebé normalmente iha indústria kuandu serimónia kultura halo ona tuir kedas ona atividade.

“Maibe kuandu implementa ona atividade maka empreza EMG sente katak sira iha fali difikuldade oitoan, maibé diskusaun entre ami ho sira la’o hela, semana kotuk ami ko’alia ona katak sira sei filafali mai ho sira-nia previzaun planu ida, ne’ebé iha marsu 2024 sira mai hodi ami diskute fali revizaun ba sira-nia planu no programa depois sira avansa,” nia akresenta.

Empreza UMT konsege ezekuta atividade balun iha Behau (Manatuto) tanba antes ne’e realiza ona serimónia kultura, maibé iha dalan klaran konsege hasoru problema internál, tanba ne’e ANM daudaun fó tempu ba empreza atu rezolve problema hodi bele halo atividade prospesaun no peskiza.

“Ami daudaun mantein liña komunikasaun nafatin ho populasaun sira, ne’ebé foin lalais ami ba ona hasoru autoridade lokál tanba sira mós foun, ne’ebé ami ba hasoru hikas hodi atualiza atividade iha área refere, nia tenik.

Antes ne’e, ANPM halo ona peskiza lubuk ida iha tinan 2017, hanesan estudu detalladu atu kompeende rekuru minerál.

“Entaun rezultadu estudu ne’ebe ita halo iha 2017 prova katak ita-nia rekursu mármore iha Manatuto, liu-liu bloku identifikadu ne’e ho kualidadade di’ak, ha’u bele dehan katak ita halo teste laboratóriu iha Austrália no Itália, entaun rezultadu laboratóriu indika katak mármore ne’e ho kualidade a’as atubele halo esplorasaun,” nia subliña.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!