iklan

HEADLINE, SAÚDE

INCSIDA husu seropozitivu HIV kontinua tratamentu regulár iha Sentru Saúde sira

INCSIDA husu seropozitivu HIV kontinua tratamentu regulár iha Sentru Saúde sira

Prezidenti Institutu Nasionál Kombate SIDA (INCSIDA-Sigla Portugés), Daniel Marçal, iha Sala Reuniaun PCM, Palacio Governu Dili, kinta (21/09). Imajen Tatoli/Francisco Sony

DILI, 09 fevereiru 2024 (TATOLI)—Prezidente INCSIDA, Daniel Marçal husu ba ema sira ne’ebé pozitivu ba HIV atu kontinua halo tratamentu regulár iha sentru saúde sira no labele ba tratamentu tradisionál ne’ebé laiha baze sientífika.

“Ha’u husu ba ema sira ne’ebé pozitivu ba HIV atu kontinua halo tratamentu regulár iha sentru saúde sira no labele ba tratamentu tradisionál ne’ebé laiha baze sientífika, tanba agora daudaun laiha tratamentu ba HIV/SIDA,” Daniel Marçal husu liuhusi entrevista ho TATOLI iha nia kna’ar fatin Praia dos Coqueiros, Dili, ohin.

Daniel Marcal, hateten dalabarak ema balun infeksaun ona ba moras HIV (Vírus imunodefisiénsia umana, sigla inglés), sira la ba teste, maibé sira kontinua halo atividade seksu livre hodi fó risku ba sira-nia moris.

“Maioria mai husi eskola sekundáriu ho universitáriu sira ne’e mak durante ne’e halo seksu livre, la’ós husi relasaun de’it maibé husi daun sira tatoo ne’ebé uzadu, depois uza fila fali ba ema seluk, inklui droga no mós instrumentu kro’at ne’ebé mak ema uza troka malu, maibé persentajen boot liu mak husi relasaun seksuál ne’e,” nia esplika.

Autoridade másima INSCIDA ne’e dehan, moras HIV/SIDA afeta ona jerasaun foin-sa’e sira, ho idade entre tinan 18 to’o 40 iha Timor-Leste.

“Agora daudaun moras HIV/SIDA afeta ba jerasaun foun sira ho idade 18 to’o idade 40 iha ita-nia rain. Entaun ho ida ne’e ami halo ona koordenasaun ho Ministériu Edukasaun liuhusi Ensinu Superiór atu teste obrigatóriu HIV/SIDA ba universidade sira hotu-hotu iha Dili no sei habelar ba universidade sira seluk iha munisípiu sira atu garante saúde ema nian ba moras ida ne’e,” nia relata.

INCSIDA durante ne’e rejista ona kazu HIV/SIDA liu 2,000 iha nasaun ne’e, husi ema 1,065 ne’ebé iha tratamentu, 577 husik tiha ona tratamentu, 200 mate ona, no maizumenus 160 lakon tiha ona.

INCSIDA mós rejista feto isin-rua na’in 15 ne’ebé infetadu ho HIV/SIDA no labarik na’in 57 ne’ebé seidauk tinan lima ne’ebé moris ho inan ne’ebé moris ho HIV.

“Kazu sira-ne’e akontese iha munisípiu hotu-hotu, ho númeru kazu sira ne’ebé aas liu mak rejista iha Dili ho ema infetadu 1.507, Bobonaro (113), Covalima (95), Oe-Cusse (62), Baucau (53), Ermera (35), Ainaro (33) no munisípiu sira seluk rejista kazu pozitivu 10 resin,” nia informa.

Iha nível globál, de’it metade (52%) husi labarik sira ne’ebé moris ho HIV mak iha tratamentu ne’ebé salva moris, dook husi ema adultu sira ne’ebé simu ona antiretroviral (76%), tuir dadus ne’ebé foin publika ona iha Atualizasaun Global ba AIDS UNAIDS 2022.

UNSIDA relata katak maizumenus ema millaun 39 iha mundu tomak moris ho HIV iha 2022.

“Maizumenus ema millaun 1.3 mak foin hetan infesaun ho HIV iha 2022 no ema na’in 630,000 mate tanba moras relasiona ho AIDS iha 2022. Ema millaun 29 resin mak asesu ba tratamentu antiretroviral iha 2022,” nia konklui.

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!