DILI, 10 fevereiru 2024 (TATOLI) – Organizasaun juvenil, Alumni Parlamentu Foinsa’e (APFTL) haktuir ba vizaun “joven síviku, saudável, krítiku, kompetetivu, produtivu no orgullu nu’udar Timoroan, iha tinan 2023, iha programa lima no sub-programa ualu iha atividade 43.
Prezidente APFTL, Zaulino Gomes da Silva informa, husi atividade 43 no konsege realiza atividade hamutuk 35, Tanba ne’e, nia konsidera iha mudansa ida signifikante no hatudu progresu servisu hosi sekretariadu organizasaun juvenil ne’e ho membru sira.
Nia enfatiza, dezenvolve kapasidade síviku joven sira nian, sensibiliza joven sira kona-ba saúde reprodutivu, servisu advokasia ba asuntu sosiál ne’ebé afeta ba joven sira-nia moris, asuntu mudansa klimátika ne’ebé mundu hasoru, dezenvolve kapasidade institusionál hanesan rekursu umanu kona-ba boa governasaun sai programa no atividade prinisipal ba organizasaun.
“Saida ami hakarak foka mak oinsá joven sira iha sensibilidade ba asuntu sosiál. Entaun, tenki halo servisu advokasia ba Governu, fornese informasaun no dadus ba Governu, atu bele influénsia desizaun polítika atu oinsá Governu iha informasaun naton atu deside polítika Governu nian bazeia ba iha evidénsia,” Zaulino hateten, iha ámbitu Asembleia jerál anuál APFTL nian, iha Salaun João Paulo II, iha Comoro, ohin.
Prezidente organizasaun juvenil ne’e relembra, organizasaun halo peskiza tulun Estadu atu deside polítika Governu ne’ebé di’ak ba nia povu, hanesan iha 2021, halo peskiza ida ba iha setór edukasaun iha ensinu superiór no partisipasaun joven nian iha setór empregu, joven barak hateten katak joven sira foti fakuldade no departamentu de estudu latuir sira-nia hakarak.
“Ida ne’e risku ba sira-nia moris no Estadu. Ida ne’e labele. Ami aprezenta relatóriu ne’e ba iha Governu no Prezidente Repúblika, tanba ita investe edukasaun atu garante futuru”, nia dehan.
Relasiona ho asembleia jerál anuál ne’e, Francisca da Costa Soares, hanesan mós membru ba APFTL ne’e, informa katak objetivu hosi asembleia ne’e atu hare kona-ba planu ba tinan 2024.
“Membru hotu tenki partisipa iha asembleia ida ne’e atu ami bele diskute ami-nia planu ba 2024 nian no ao mesmo tempu ami mós halo apresiasaun ba relatóriu anuál 2023 nian,” nia konklui
Jornalista: Jesuína Xavier
Editór: Florencio Miranda Ximenes
