iklan

DILI, POLÍTIKA

António Verdial troka Olinda Guterres sai Xefe bankada KHUNTO

António Verdial troka Olinda Guterres sai Xefe bankada KHUNTO

Membro Deputado KHUNTO, António Verdial De Sousa. Imajen/Tatoli Egas Cristovao

DILI, 12 fevereiru 2024 (TATOLI)—Deputadu António Verdial de Sousa, troka Deputada Olinda Guterres sai Xefe Bankada Kmanek Haburas Unidade Nasionál Timor-Oan (KHUNTO) iha Parlamentu Nasionál (PN).

“Liuhosi ofísiu ida-ne’e, hato’o ba Prezidente Parlamentu Nasionál katak liuhosi deliberasaun iha bankada nian iha 08 fevereiru 2024, maiória Deputadu hosi bankada  KHUNTO deside, ho nune’e Xefe Bankada foun ho Vise Xefe Bankada foun tuir balansu no polítika ne’ebé iha konstitui hanesan, Xefe Bankada Deputadu António Verdiál de Sousa,  Primeiru Vise Bankada  Deputadu António Verdiáa da Silva Fereira, Segundu Vise bankada Luis Roberto da Silva,” Sekretária Meza PN, Deputada Virginia Ana Belo, halo leitura karta hosi bankada KHUNTO iha reuniaun plenária PN, segunda ne’e.

Mezmu nune’e, Deputada Olinda Guterres, lamenta ho líder órgaun partidu la halo konsultasaun ho nia nu’udar Xefe Bankada antes ne’e, no nu’udar fundadór no inisiadór ba partidu Kmanek Haburas Unidade Nasionál Timor-Oan (KHUNTO).

“Ami-nia Prezidente Partidu KHUNTO ninian, nein halo konsultasaun ba ami na’in-lima (5) nu’udar Deputadu iha Parlamentu. Atu hadau poder, ha’ u la hadau. Karik, Prezidente mak hadau poder maibé ha’u lae. Kuandu halo buat ida  tenke konsulta ho ha’u, tanba poder ha’u la interrese ida. Deputada Olinda nafatin Deputada,” nia hateten.

Prezidente Parlamentu Nasionál, Maria Fernanda Lay, husu deskulpa ba Deputada Olinda Guterres, tanba pedidu ida-ne’e mai hosi bankada KHUNTO, tanba ida-ne’e internál bankada nian no nia-parte lakohi tama.

Nune’e, nia husu atu organiza didi’ak mak lori mai plenária, no dever prezidente PN nian atu ajenda.

Segundu Vise Bankada KHUNTO, Deputadu Luis Roberto, hateten halo mudansa ba estrutura bankada ninian ne’e laiha vigansa ruma.

“Ami haree ba ami-nia Xefe Bankada, Deputada Olinda Guterres hanesan dalaruma moras, entaun husu tuir no rejimentu mós ka’er metin atu to’o iha ne’eba atu permanente laiha. Ida-ne’e mak hanesan liu na’in-lima tur hamutuk hodi halo mudansa, la’ós siginfika atu hasai nia ne’e la’e, maibé atu halo mudansa hosi aselera serbisu,” nia dehan.

Jornalista : Nelson de Sousa

Editór        : Cancio Ximenes  

iklan
iklan

Leave a Reply

iklan
error: Content is protected !!