Komisaun E husu aselera implementasaun projetu emerjénsia
DILI, 12 fevereiru 2024 (TATOLI)—Prezidente Komisaun E trata asuntu Infraestrutura iha Parlamentu Nasionál (PN), Deputadu Marcos Xavier, husu Governu liuhosi ministériu relevante aselera implementasaun projetu emerjénsia.
“Kona-ba emerjénsia, ita bankada Governu, ha’u mós konkorda ho ida-ne’e. Emerjénsia dehan 57 projetu emerjénsia, maibé realidade halo de’it projetu 16 maibé projetu 16 ne’e balun la la’o, ida-ne’e halo núsa. Husu Governu toma atensaun labele buat hotu-hotu di’ak iha implementasaun ladi’ak,” Prezidente komisaun E ne’e hato’o liuhosi reuniaun plenária PN, segunda ne’e.
Deputadu husi bankada CNRT ne’e, husu atu parte ezekutivu aselera prosesu implementasaun projetu emerjénsia sira.
Antes ne’e, Vise Ministru ba asuntu Parlamentár, Adérito Hugo da Costa, hateten Governu identifika ona infraestrutura hamutuk 56 kompostu hosi estrada, ponte, irrigasaun ne’ebé hetan estragu hosi dezástre naturál hodi reabilita ho karáter urjénsia.
“Governu liuhosi rezolusaun ida iha Konsellu Ministru aprova iha semana liu ba, liuhosi Ministériu Obra Públika halo levantamentu faktu sira iha durante ne’e deteta iha 56 pontu sira ne’ebé estrada, ponte no irrigasaun ne’ebé kategoriza emerjénsia,” Vise Ministru ne’e hateten liuhosi reuniaun plenária Parlamentu Nasionál hodi responde preokupasaun Deputadu sira-nian, iha loron 02 outubru 2023.
Governu aprova ona desizaun ne’e hodi Ministériu Obra Públika (MOP) atu halo implementasaun hahú ona halo reabilitasaun ho karáter emerjénsia ba fatin sira temi ho totál projetu 56.
“Espera katak, tanba agora ita tama ona ba fulan outubru, tanbasá desizaun Governu foti desizaun pontu hamutuk 56 ne’e hanesan emerjénsia. Tanba akonsetimentu sira liga ho udan boot inisíu tinan ne’e estragu barak nunka halo reabilitasaun. Haree ba ida-ne’e, se ita liuhosi prosesu normál la konsege intervensaun imediata,” nia hateten.
Tanba ne’e, Governu deside ona halo normalizasaun konstrusaun ba estrada sira ho karáter emerjénsia.
MOP daudaun ne’e hala’ o hela serbisu hodi konvida setór privadu sira-ne’ebé iha kapasidade no kompeténsia bele ezekuta hadi’a estrada, ponte no irrigasaun sira lalais antes tama ba tempu udan iha fulan-novembru ka dezembru tinan 2023.
Jornalista : Nelson de Sousa
Editór : Cancio Ximenes
