PD preokupa alumni IPB grau D2 defisil konkorre ba vaga ruma
DILI, 12 fevereiru 2024 (TATOLI)—Deputadu bankada PD, Manuel Hernique Noronha, preokupa ho alumi hosi Institutu Politékniku Betano (IPB) ne’ebé ramata ona sira-nia estudu ho grau eukasaun D2 (baixarelatu) defisil tebes atu konkore ba vaga iha funsaun públika no instituisaun Estadu sira.
“Institutu Politékniku Betano (IPB) ema barak nia oan mak aprende iha ne’eba no IPB iha totál alumi 401 ne’ebé mak ho sertifikadu D2. Susár tebes atu sira konkorre iha vaga ruma tanba ita-iha Timor-Leste grau edukasaun nível kiik-liu mak baixarelatu ho D3,” Deputadu PD ne’e levanta liuhosi reuniaun plenára PN, segunda ne’e.
Ho ida-ne’e, nia hateten, alumni IPB sira konsiente katak mezmu sira iha grau edukasaun D2 maibé laiha dalan atu kompete, tanba la prienxe kritéiru mak fó sai hosi Komisaun Funsaun Públika (KFP) ba vaga sira-ne’e.
Nia dehan, IPB hanesan institutu públiku ne’ebé mak estabelese iha tinan 2017 no hetan ona akreditasaun hosi Governu, maibé sei mantein nafatin ho grau edukasaun dD2 no laiha mudansa, ida-ne’e difikulta tebes estudante sira-nia futuru.
“Ho ida-ne’e, hato’o ba IX Governu Konstitusionál halo mudansa ba ida-ne’e, atu nune’e estudante sira ramata estudu iha IPB bele iha posibilidade hodi konkorre iha vaga ruma, tanba durante ne’e iha vaga ruma husu mak diploma D3, S1, S2, maibé D2 la temi iha ne’eba. Ida-ne’e problema boot ne’ebé ita-nia oan sira halo estudu iha IPB,” nia dehan.
Vise Ministru ba asuntu Parlamentár, Adérito Hugo da Costa, hateten asuntu ida-ne’e dezde iha tinan 2009 mai TL iha de’it rejime ida lei baze edukasaun mak regula ita-nia sistema edukasaun iha tinan barak nia laran.
Nune’e, nia dehan, atu rezolve kestaun hira ne’e mak agora duni liuhosi Ministériu Ensinu Superiór submete mai iha Konsellu Ministru, dekretu-lei ida ba lei baze edukasaun ne’ebé atu haree mós kestaun refere hodi fó resposta konkreta ba preokupasaun ne’ebé Deputadu PD foti.
“Entaun, ami rejista asuntu ne’e, bele prevee mós iha proposta-lei ne’ebé agora sei iha Konsellu Ministru sei haruka mai Parlamentu atu haree oinsá mak ita atu regulariza ensinu superiór sira-ne’ebé iha. Hanesan kazu IPB nian, depois sira hetan diploma dois la konsege absorve iha kampu traballu,” nia dehan.
Jornalista : Nelson de Sousa
Editór : Cancio Ximenes
