iklan

HEADLINE, SEGURANSA

Polísia detein profesór na’in-10 ne’ebé halo asaun pasífika iha edifísiu ME

Polísia detein profesór na’in-10 ne’ebé halo asaun pasífika iha edifísiu ME

Komandante Sup Xefi Munisípiu Dili, Orlando Gomes. Imajen Tatoli/Francisco Sony

DILI, 12 fevereiru 2024 (TATOLI) –  Polísia detein profesór na’in-10 tanba halo manifestasaun iha edifísiu Ministériu Edukasaun (ME) sein halo karta koñesimentu ba Komando Polísia Munisípiu Dili.

Komandante Polísia Munisípiu Dili, Superintendente Xefe Polísia Orlando Gomes, informa manifestante na’in-10 ne’ebé polísia ka’er ne’e mesak manorin de’it. Daudaun, sira iha ona edifísiu polísia Dili hodi submete ba prosesu investigasaun tuir lei ne’ebé vigora.

“Ohin, kaptura profesór sira ne’e tanba sira tenta bá halo manifestasaun iha edifísiu Ministériu Edukasaun sein iha karta koñesimentu mai Komando Munisípiu Dili. Tanba ne’e, ita konsidera sira-nian asaun ne’e ilegál”, Orlando Gomes hatete iha Comoro, ohin.

Superintendente xefe ne’e afirma katak asaun ne’ebé polísia halo tanba menifestante sira ne’e tenta tama bá edifísiu ME nian, maibé lahetan autorizasaun husi ekipa seguransa sivíl, tanba ne’e, polísia halo intervensaun hodi halo kedan asaun hasoru manifestante sira hodi detein profesór sira ne’e.

“Bainhira ita halo ona prosesu investigasaun ba sira, ita sei detein sira durante oras 72 depois ita sei enkamiña ba Ministériu Públiku atu submete ba Tribunál”, salienta.

Manifestante na’in-10 ne’ebé hetan detensaun kompostu husi feto haat no mane neen. Sira ne’e manorin de’it tanba ne’e Komando Polísia husu ona ba sira atu kontinua hato’o karta koñesimentu kona-ba asaun saida de’it maka sira atu halo.

“Nu’udar autoridade seguransa Estadu presiza hetan karta koñesimentu husi asaun ruma ne’ebé mak ita-nian profesór ka minifestante sira halo, nune’e ami bele dirije sira atu bá halo iha ne’ebé? Bainhira laiha karta koñesimentu, polísia sei halo intervensaun”, katak.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!