iklan

EKONOMIA, BOBONARO, HEADLINE, MUNISÍPIU

Ponte ligasaun Cailaco-Maliana ameasadu kotu

Ponte ligasaun Cailaco-Maliana ameasadu kotu

Kondisaun atuál estrutura ponte Bulobu, suku Manapa, ligasaun hosi postu administrativu Cailaco ba postu administrativu Maliana, munisípiu Bobonaro. Imajen Tatoli/Sérgio da Cruz.

CAILACO, 12 fevereiru 2024 (TATOLI) – Hafoin akontese udan-boot hahú hosi fulan-janeiru to’o oras ne’e rezulta bee-mota Bulobu kontinua sobu estraga estrutura ponte Samutabe, suku Manapa, ligasaun hosi postu administrativu Cailaco ba Maliana, munisípiu Bobonaro, daudaun ne’e falta de’it metru ida atu kotu totál.

Antes ne’e ponte refere kotu totál iha fulan-dezembru tinan kotuk no momentu ne’ebá Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI, IP) konsege halo normalizasaun hodi fasilita movimentasaun transporte públiku no privada.

Komunidade suku Manapa, Gabriel Fernandes Moniz, hateten atualmente kondisaun ponte refere hela de’it espasu ba motorizada no daudaun ne’e karreta ki’ik no boot defisil tebes atu ultrapasa.

Notísia relevante: Mota Bulobu kontinua estraga ponte Cailaco-Maliana

“Ita haree ba agora ponte ne’e atu kotu, hela de’it sorin, oituan tán kotu ona, agora karreta labele liu ba mai tanba mota estraga tiha ponte ne’e, ami husu ba governu atu tau matan ba ponte ne’e, se la tau atensaun lalais ponte ne’e bele kotu, ami atu ba ne’ebé tanba ba Cailaco ho Maliana ne’e dalan mak ida-ne’e de’it,” nia ko’alia iha Cailaco, segunda ne’e.

Kondisaun atuál estrutura ponte Bulobu, suku Manapa, ligasaun hosi postu administrativu Cailaco ba postu administrativu Maliana, munisípiu Bobonaro. Imajen Tatoli/Sérgio da Cruz.

Nia hatutan, kondisaun ponte refere difikulta tebes komunidade sira atu lori produtu lokál asesu ba merkadu, liuliu karreta ambulánsia atu transporta pasiente ba Ospitál Referál Maliana.

“Sira mai mós para de’it iha-ne’e ona, labele liu ba tanba de’it kondisaun ponte ne’e mak hanesan ne’e, transfere de’it, hanesan foin daudaun família balu moras iha kraik, urjente kalan boot telefone fali ambulánsia Maliana mai hein iha-ne’e hafoin transfere ba Maliana,” nia dehan.

Xefe suku Manapa, Zeferino Loco Bere, informa ona ba Administradór Postu Cailaco atu koordena ho parte Polísia Nasionál Timor-Leste (PNTL) munisípiu Bobonaro atu taka provizóriu tanba kondisaun ponte refere grave.

“Ita-nia ponte ne’e tuir loloos labele liu ona, maibé ami haree katak ita-nia transporte sira-ne’e sempre liu, maibé obriga, entaun ita hakarak taka tiha nune’e labele iha asidente ruma, se lae ema bele fó sala fali ba ita,” nia katak.

Líder lokál ne’e hateten, hafoin ponte refere hetan estragu nia parte hamutuk ho administradór postu Cailaco hato’o ona pedidu ba Prezidente Autroridade Munisipál Bobonaro hodi enkamiña ba Ministériu Obra Públika atu rezolve imediata.

“Ami konsulta ona ho Obra Públika munisípiu sira relata ona ba nasionál katak desizaun ne’e sira nasionál mak bele foti, sira hosi munisípiu laiha orsamentu ba emerjénsia ninian, ne’e kompetensia nasionál ninian, maibé to’o agora ami seidauk rona desizaun ruma hosi nível altu, atu halo reabilitasaun ka konstrusaun foun.”

Tuir observasaun Jornalista Agência Tatoli iha terrenu nota katak, transporte roda rua ka motorizada movimentu normál hela no karreta balu deside liu de’it iha mota laran bainhira bee mota menus no la udan.

Notísia relevante: Ponte ligasaun Cailaco ba Maliana kotu

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!