iklan

NASIONÁL, EKONOMIA, HEADLINE

ANP no Alfándega introdús desalfandegamentu petróleu refinadu liuhosi plataforma interkoneksaun

ANP no Alfándega introdús desalfandegamentu petróleu refinadu liuhosi plataforma interkoneksaun

Prezidente ANP, I.P, Gualdino do Carmo da Silva. Imajen Tatoli/António Daciparu

DILI, 13 fevereiru 2024 (TATOLI)-Autoridade Nasionál Petróleu, Institutu Públiku (ANP, I.P) hamutuk ho Ekipa Janela Únika ka Timor-Leste Single Window (TileSW) inklui Autoridade Aduaneira (AA)/Alfándega disemina ba importadór kombustível no custom broker sira kona-ba lala’ok serbisu plataforma eletrónika ho ASYCUDA no plataforma interkoneksaun rua liuhosi Sistema Janela Únika Eletrónika Nasionál.

Prezidente ANP, Gualdino do Carmo da Silva, hateten, ANP no Alfándega kompleta ona interkoneksaun entre sistema ASYCUDA ho plataforma komersializasaun eletrónika liuhosi Janela Únika Eletrónika Timor-Leste. Interkoneksaun ne’e implementa hafoin asina protokolu entre instituisaun rua durante konferénsia daruak kona-ba Sistema Eletróniku Janela Únika Timor-Leste iha loron 28 setembru 2023. Nune’e, interkoneksaun entre sistema rua ne’e sei asiste hosi parte rua iha prosesu interkoneksaun informasaun kona-ba autorizasaun ba tranzasaun no sirkulasaun livre ba produtu petróleu refinadu.

“Ida-ne’e hatudu katak durante ne’e ekipa hosi parte rua serbisu maka’as atubele garante sistema rua ne’e bele interliga no funsiona. Utilizadór ba sistema ida-ne’e la’ós hosi autoridade rua maibé mós setór privadu ne’ebé envolve-an iha negósiu importasaun kombustível mai rai-laran,” Prezidente ANP hateten hafoin halo abertura ba sorumutu ne’ebé realiza hosi ANP no Alfándega, iha Delta Nova, tersa ne’e.

Notísia relevante : Sistema ASYCUDA World ajuda Alfándega iha servisu prosesa dokumentu merkadoria

Objetivu sorumutu ne’e atu empreza importadór sira bele iha koñesimentu kona-ba prosesu desalfandegamentu produtu petróleu refinadu liuhosi plataforma interkoneksaun no sei fahe informasaun kona-ba aprovasaun ba tranzasaun no sirkulasaun livre ka free circulation hodi priense rekezitu.

Aliende ne’e, sei fahe no troka mós hanoin kona-ba observasaun durante utilizasaun interkonesaun sistema eletrónika, hahú hosi prosesu aplikasaun importasaun to’o prosesu desalfandegamentu.

Iha biban hanesan, Komisáriu AA/Alfándega, José António Fátima Abílio, apresia tebes ba inisiativa ANP tanba sei benefisia no hafasil empreza importadór kombustível nia serbisu.

“Implementasaun sistema ne’e lori mudansa signifikativu ba serbisu loron-loron. Klaru katak ko’alia kona-ba sistema hanesan buat ida lafasil no presiza mós investimentu, atu dehan sistema ASYCUDA ho TileSW 100% hanesan investimentu hosi Governu la’ós hosi doadór, embora parseiru sira presiza fó asisténsia téknika. Tanba ne’e ita haree katak maski ita iha difikuldade kona-ba orsamentu maibé Governu halo esforsu hotu oinsá bele fasilita instituisaun relevante sira atubele hadi’a sira-nia funsaun bainhira hala’o serbisu hodi fó rezultadu di’ak ba ita hotu,” nia akresenta.

Sorumutuk ne’e nu’udar oportunidade di’ak ba importadór kombustível inklui custom broker sira bele partilla informasaun kona-ba mudansa, liu-liu ligasaun ho prosesu importasaun ka lisensamentu ba mina olifrikasaun sira.

Antes ne’e, bainhira la’o ho prosesu manuál serbisu lori tempu, maibé ho mudansa ne’e bele muda serbisu no halais prosesu sira. Daudaun ajénsia 13 inklui ANP implementa ona Janela Únika.

Ajuda prosesu pagamentu

Responsável Downstream empreza ETO, Alberto Soares, fó sasin katak implementasaun sistema ne’e ajuda tebes sira-nia serbisu, liu-liu pagamentu bainhira ajénsia sira importa kombustível.

“Ami hanesan empreza importa kombustível, ami haree sistema ne’e di’ak tanba antes ne’e sistema ANP ho Alfándega nian ketak-ketak, katak trata tiha dokumentu sira iha ANP mak ba fali Alfándega nian tanba sistema manuál, maibé agora sistema interligadu ona fasilita tebes ami, fasil, la lakon ona tempu, no bele halo serbisu di’ak no lais liu,” nia haktuir.

Maski nune’e, Alberto rekomenda katak iha buat balun tenke hadi’a hosi sira-nia parte bainhira ajénsia sira hatama prosesu atu hasai resivu ba halo pagamentu tenke hein fali númeru tranzasaun ka aprovasaun hosi ANP.

“Sujere númeru ida ne’e sé bele integra tiha ba sistema para ajénsia ba check katak hetan ona aprovasaun bele print de’it ona, la persiza kontaktu malu. Antes ne’e ami hetan ona formasaun oinsá utiliza sistema refere,” nia tenik.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!