iklan

POLÍTIKA

KFP sei halo diagnóstiku ba liña ministériál

KFP sei halo diagnóstiku ba liña ministériál

Prezidente CFP Agostinho Letencio de Deus. Imajen Tatoli/Egas Cristovão

DILI, 13 fevereiru 2024 (TATOLI)—Komisaun Funsaun Públika (KFP) sei halo diagnóstiku ba liña ministériál no Institutu Públiku (IP) ho Empreza Públika (EP) sira iha semana oin.

Notísia Relevante: Agostinho Letêncio: “Durante mandatu sei foka ba programa prinsipál lima”

Prezidente KFP, Agostinho Letêncio de Deus, hateten hafoin simu pose iha 22 novembru 2023  to’o agora, durante fulan rua ne’e, programa ho nia  atividade ka serbisu sira-ne’ebé hala’o mak hahú tiha ona diskusaun ba programa jerál tinan lima KFP nian, no iha semana oin sei realiza programa diagnóstiku ba liña ministériál nomós IP ho EP sira.

“Bolu programa diagnóstiku ba ministériu sira sei hala’o iha semana oin. Ida-ne’e atu hatene problema loloos ba iha funsionáriu públiku ne’e iha ne’ebé, nune’e primeiru hakarak  hatene totál funsionáriu iha kada liña ministeriál atu haree permanente, ajente no mós kazuál sira. Hosi ne’e, ita mós haree abilidade sira-nian ne’e reflete duni ba nesesidade instituisaun, no ita atu haree mós estutura, departamentu, no sei hare mós Institutu Públiku no Empreza Públika sira. Liuliu, komparasaun entre rejime jerál ho espesiál ne’ebé iha tendénsia atu aumenta rejime espesiál no atendimentu iha nasionál ho mós atendimentu munisípiu sira,. Hafoin ne’e, komisaun sei hato’o relatóriu,” Prezidente KFP ne’e hateten ba Agência Tatoli liuhosi programa “Entrevista Eskluziva” iha estúdiu TATOLI, Faról, tersa ne’e.

Aleinde ne’e, nia dehan, durante fulan rua komisaun ninia atividade seluk mak liga ba polítika públika nian iha ona alterasaun ba dekretu-lei númeru 25/2016 liga ho rejime kargu dirijente no xefia ne’ebé anteriormente ba sira-ne’ebé asume diretór presiza grau “C” no diretór jerál presiza grau “B” no asume xefe departamentu grau “D”.

Maibé, haree ba realidade kareira funsionáriu públiku liuliu iha munisípiu sira maiória ho grau “E” ho “D”, entaun lomisuan haree komparasaun funsionáriu la’ós de’it haree ba nia grau maibé bele haree ba nia esperiénsia nune’e dekretu-lei ne’e atu reajusta entre nia grau ho pozisaun, ezemplu mak iha munisípiu ne’e funsionáriu ho grau “E” ka “D” bele asume diretór.

“Agora serbisu seluk ne’ebé daudaun la’o hela preparasaun ida i-recruitment la kle’ur tan sei  serbisu hamutuk ho Ministériu Edukasaun (ME)  ba rekrutamentu manorin sira. No mós atividade ida agora halo hela mak estudu liuliu ho forsa traballu funsionáriu públiku nian, ita atu hatene loos rásiu totál funsionáriu hira kompara ho ita-nia totál populasaun,” nia dehan.

Durante implementasaun atividade sira ne’e, Prezidente KFP ne’e dehan dezáfiu infrenta mak dahuluk baze dadus ne’e rasik dalabarak por exemplu ekipa KFP ba vizita RAEOA informasaun liliu liga ho rekursu umanu dalabarak ita iha informasaun ne’ebé diferensa ita ho ida seluk ita ladun ho dadus ne’ebé estruturadu iha instituisaun hotu, entaun ida ne’e mak ita hanoin atu mellora.

Dezáfiu seluk mak ohin loron KFP haree iha tendénsia atu aumenta ajente sira, bainhira KFP kompara karik funsionáriu públiku permanente iha ona rihun 37, maibé ema hotu akompaña iha mídia iha tendénsia kada ministériu iha ezijénsia aas atu bele kontinua rekruta ajente sira, entaun seidauk harre komparasaun nesesidade ho forsa traballu ne’e rasik.

Nune’e, dijerente másimu KFP ne’e fiar ho konfiansa ne’ebé hetan hosi Primeiru-Ministru, Kay Rala Xanana Gusmão, no apoiu hosi parte hotu sei ultapasa dezáfiu sira-ne’e.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!