F-FDTL konsege reabilita irigasaun ida iha Manatutu
DILI, 14 fevereiru 2024 (TATOLI) – Xefe Estadu Maiór Jenerál Falintil-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, dehan membru F-FDTL hosi ordem enjinaria konsege reabilita irigasaun ida iha Manatutu ne’ebé hetan estragu hosi inundasan iha 4 abríl 2021.
“Membru F-FDTL hosi enjinaria, konsege reabilita irigasaun ida iha Manatutu ne’ebé hetan estragu hosi inundasan ne’ebé akontese 4 abríl 2021. Irigasaun ne’e agora di’ak ona no bele utiliza ona no aban ita sei halo inagurasaun hodi hatama bee iha laran atu fornese ba natar sira iha Manatutu”, Falur Rate Laek hateten ba jornalista sira hafoin partisipa misa sinzas iha Kuartel Jenerál F-FDTL Fatuhada, kuarta, ohin.
Nia dehan, irigasaun ne’e uluk Governu Japaun mak konstrui hodi fornese bee ba natar sira iha Manatutu maibé iha udan bo’ot ne’ebé akontese iha 4 abríl 2021 mosu inudasaun hodi estraga irigasaun refere.
“Entaun komunidade sira no veteranu sira hosi Manatutu mai koalia ho ha’u no Komandu F-FDTL ita iha kooperasaun ida ho naran sivil militár ka bolu Civil Militar Coperation (CIMIC) tanba ne’e ha’u haruka ita-nia forsa enjinaria atu ba reabilita irigasaun ne’e no agora di’ak”, nia haktuir.
Falur haktuir, Primeiru-Ministru Xanana Gusmão apresia ho servisu F-FDTL ne’ebé halo ona reabilitasaun ba irigasaun ida iha Manatutu.
” Primeiru-Ministru Xanana apresia ho ida-ne’e. nia dehan ida-ne’e servisu ne’ebe di’ak, espera F-FDTL kontinua servisu sira hanesan ne’e”, nia hakotu.
Jornalista: Natalino Costa
Editór : Zezito Silva
