F-FDTL prontu apoia PNTL asegura vizita Amo Papa mai TL
DILI, 14 fevereiru 2024 (TATOLI) – Xefe Estadu Maiór Jenerál Falintil-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hateten F-FDTL no PNTL sei apoiu malu hodi fó seguransa ba vizita Santo Padre Papa Francisco sei vizita Timor-Leste iha agostu tinan ne’e.
“Automatikamente ami sei fó apoiu másimu ba PNTL atu asegura seguransa liga ho vizita Santo Padre Papa Francisco sei vizita Timor-Leste”, Falur Rate Laek hateten ba jornalista sira hafoin partisipa missa sinzas iha Kuartel Jenerál F-FDTL Fatuhada, kuarta, ohin.
Nia dehan, Komandu F-FDTL hahú ona enkontru ho komisaun organizadora ba vizita Santo Padre nian.
“Am horseik enkontru hodi koalia kona-ba seguransa F-FDTL no polísia, nia husi ami aprezenta ona saida mak ami sei halo iha vizita ne’e, ami koalia hotu ona, fatin sira ne’ebé ami ei halo seguransa ba, tanba F-FDTL la iha problema”, nia afirma.
Falur kompromete katak F-FDTL no PNTL sei fó seguransa másima liga ho vizita Santo Padre iha Timor-Leste.
“Husu ba sidadaun hotu, entidade sira atu kontribui ho di’ak, rona buat ruma ameasa, tenke informa ba autoridade seguransa no defeza atu bele halo intervensaun lalais. Sé ema hotu kotribui ho di’ak buat hotu sei la’o di’ak, seguransa sei lao di’ak tanba vizita ida-ne’e nudar istória ida ba Timor-Leste, ita hotu tenke kontribui seguransa ho di’ak atu situasaun bele lao di’ak”, nia adianta.
Jenerál ne’e garante katak situasaun seguransa sei lao di’ak perante vizita Santo Padre nian inklui vizita Prezidente Indonézia Jokowidodo iha Timor-Leste.
“Ita sei iha vizita rua, ida mak vizita Sua Santidade Amo Papa Francisco iha fulan agostu inklui vizita Prezidente Indonézia Jokowidodo iha Timor-Leste, ha’u garante buat hotu sei lao di’ak”, nia hakotu.
Jornalista: Natalino Costa
Editór : Zezito Silva
