Komandu F-FDTL simu karta hosi ONU partisipa misaun pás iha Sudaun Súl
DILI, 14 fevereiru 2024 (TATOLI) – Xefe Estadu Maiór Jenerál Falintil-Forsa Defeza Timor-Leste (F-FDTL), Tenente Jenerál Domingos Raul Falur Rate Laek, hateten Komandu F-FDTL simu ona karta hosi Organizasaun Nasaun Unida (ONU) atu nomeia membru F-FDTL sira hodi partisipa tán misaun pás iha Sudaun Súl tinan ida-ne’e.
“ONU mós haruka tán ona karta ofisiál ida mai ha’u no ha’u simu ona karta ne’e no iha karta ne’e, ONU husu para Komandu F-FDTL nomeia ofisiál Superiór F-FDTL atu partisipa iha misaun pás iha Sudaun Súl tinan ne’e. Tanba ne’e hanesan Xefe Estadu Maiór Jenerál F-FDTL ha’u nomeia tiha ona ofisiál F-FDTL feto ida, nia mak sei ba partisipa misaun pás iha Sudaun Súl tinan ne’e”, Falur Rate Laek hateten ba jornalista sira hafoin partisipa missa sinzas iha Kuartél Jenerál F-FDTL Fatuhada, kuarta, ohin.
Falur lakohi fó sai naran Ofisiál Superiór ne’ebé mak nomeadu atu partisipa misaun pás iha Sudaun Súl tanba ida-ne’e regra Komandu F-FDTL nian.
Nia dehan, bainhira ofisiál superiór ne’e ba ona Sudaun Súl mak públiku foin hatene tanba Komandu F-FDTL sei halo serimónia bo’ot ba deslokamentu ofisiál superiór ba Sudaun Súl.
Tanba ne’e, Komandu prepara tan ona membru F-FDTL hodi tuir formasaun lian ingés no portugés inklui formasaun sira seluk iha Sentru Intrusaun Nicolau Laobato Metinaro.
“Ita-nia partisipasaun sei kontinua, tanba foin daudaun ha’u ba tuir enkontru ida iha Bankong Thalandia nasaun sira ASEAN nian husu para ita-nia forsa hamutuk ho nasaun ASEAN sira atu partisipa misaun pás, maibé ida-ne’e depende ba desizaun polítika”, nia hakotu.
Jornalista: Natalino Costa
Editór : Zezito Silva
