iklan

EDUKASAUN, MUNISÍPIU, VIQUEQUE

EBF 01 Irabin de Baixo menus sala-de-aula, Domingos: “Tau ona planu”

EBF 01 Irabin de Baixo menus sala-de-aula, Domingos: “Tau ona planu”

Koordenadór EBF 01 Irabin de Baixo, José da Silva. Imajen Tatoli/Vitorino Lopes

VIQUEQUE, 15 fevereiru 2024 (TATOLI) –Ensinu báziku sentrál filial (EBC, sigla portugés), 01 Irabin de Baixo, Postu administrativu Uatucarbau, Munisípiu Viqueque, menus sala-de-aula no profesór sira nune’e atividade letiva iha eskola refere.

 

“Tanba ne’e, ha’u husu ba Ministériu Edukasaun (ME) aumeta tan, konstrui edifísiu eskola foun atu nune’e fahe estudante sira bele eskola iha laran. Se la aumenta sai hanesan difikuldade ba eskola tanba difisil atu profesór sira kontrola.  Nune’e mós, presiza aumenta profesór hodi hanorin estudante ne’ebé ho kuantidade bo’ot,” Koordenadór EBF 01 Irabin de Baixo, José da Silva, informa ba Agência TATOLI, I.P, iha postu Uatucarbau, kinta ne’e.

 

Koodenadór ne’e hatutan, sala-de-aula ne’ebé la sufisente, nia parte deside estudante hosi segundu siklu bá eskola fali iha EBC 13 Uatucarbau, hamutuk na’in-49, hodi redús númeru estudante, maibé agora estudante kontinua aumenta.

 

“Ha’u hakarak relata katak aula la sufisente hodi ha’u deside estudante hosi segundu siklu kompostu husi klase lima no klase neen mak muda bá EBC 13 Uatucarbau tanba ami iha de’it sala-aula ne’ebé daudaun ne’e iha hamutuk neen no kuantidade estudante barak. Tan ne’e, kada sala ida ami akumula estudante na’in-40 resin iha sala ida,” José relata.

 

Nune’e, José dehan, daudaun ne’e estudante husi primeiru siklu klase primeiru to’o klase kuartu maka sei eskola hela EBF 01 Irabin de Baixo, maibé sala sei kontinua la sufisiente nafatin, maske muda ona estudade hosi segundu siklu.

 

Tuir nia, antes ne’e hato’o beibeik ona pedidu hodi ba servisu edukasaun munisípiu Viqueque, maibé seidauk resposta hodi konstrui sala-de-aula no aumenta profesór.

 

“Ba bolsa vaga profesór ne’ebé agora dadaun ME rekruta ne’e hotu, bele ko’alia mós profesór balun ba iha ami-nia eskola hodi hanorin estudante sira,” nia espera.

 

Hatan ba kestaun ne’e, Diretór servisu edukasaun munisípiu Viqueque, Domingos Brandão, haktuir, kona-ba preokupasaun eskola sira nian relasiona ho menus sala-de-aula ba atividade apredizajen no menus profesór, Servisu edukasaun munisípiu Viqueque tau ona ba prioridade.

 

“Kona-ba preokupasaun EBF 01 Irabin de Baixo menus sala-aula ne’e ami tau ona ba Planu Integradu Dezenvolvimentu Munisipál (PDIM), ne’ebé sei ajusta ba orsamentu 2024 no 2025 hodi halo konstrusaun edifísiu eskola. Bele akontese iha tinan ida-ne’e, ou tinan oin tanba ami ajusta ona. Enkuantu profesór agora daudaun ami halo hela identifikasaun ba profesór iha eskola sira ne’ebé maka profesór barak, bainhira ami identifikasaun hotu hafoin koloka bá eskola sira-ne’ebé menus profesór,” nia garante.

 

Entretantu, tuir dadus, estudante EBF 01 Irabin de Baixo totál 208, kompostu husi klase 1 estudante na’in-60, klase rua na’in-48, klase tolu na’in-50 no klase haat na’in-50 no profesór sira hamutuk na’in hitu no sei presiza tan profesór na’in ualu.

 

Jornalista : Vitorino Lopes da Costa

Editór         : Rafael Ximenes de A. Belo

iklan
iklan

Leave a Reply

iklan
error: Content is protected !!