DILI, 15 fevereiru 2024 (TATOLI)–Governu liuhosi Vise-Primeiru Ministru no Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano ‘Assanami’ Sabino no Pro-Prezidente Konferénsia Episkopál Timorense (CET, sigla portugés), Dom Vírgílio Kardeál do Carmo da Silva, asina akordu subvensaun montante millaun $15 hodi finansia atividade igreja iha Timor-Leste.
Pro-Prezidente Konferensia Episkopal Timorense (CET, sigla portuges), Dom Vírgílio Kardeál do Carmo da Silva, SDB, hateten, ohin hanesan data ida-ne’ebé hanesan kada tinan uma kreda ka igreja Timor selebra akordu anuál ba implementasaun ba akordu kuadru konkordata ne’ebé asina tinan rua liuba entre Vatikanu ho Governu Timor-Leste.
“Asinatura ohin ninian ne’e, hahú ona atu implementa orsamentu ne’ebé Estadu IX Governu nian aloka ba igreja katólika ne’ebé ohin ha’u reprezenta konferénsia episkopál no Governu nian liuhosi Vise Primeiru-Ministru, ami rua asina akordu ida-ne’e. Ho akordu ne’ebé ohin ami asina ne’e, osan millaun $15,” Dom Virgílio Kardeál hateten ba jornalista sira hafoin asina akordu subvensaun iha Palásiu Governu, kinta ne’e.
Akordu ne’e asina kada tinan lima, ne’ebe kada tinan igreja ho Governu renova akordu ida-ne’e ho Governu ne’ebé de’it, no ho espirítiu konkordata nian orsamentu ne’e aloka ba iha kategoria tolu mak hanesan eukasaun, servisu sosiál no servisu uma kreda nian.
Dom Vírgílio garante, osan millaun $15 ne’e fahe ba kada dioseze tolu iha área tolu ne’e, no iha planu ba iha konstrusaun fízika ba katedrál Baucau.
Iha tina kotuk, igreja utiliza osan liu millaun $6 ba iha konstrusaun fíziku ba igreja parokia no eskola parokia iha dioseze tolu ne’e nia laran no restante utiliza ba formasaun no administrasaun nian.
Vise-Primeiru-Ministru no Ministru Kordenadór ba Asuntu Sosiál, Mariano ‘Assanami’ Sabino, hateten Governu mós kontinua fó apoiu ba iha sosiedade sivil no konfisaun relijiaun seluk, agora ida-ne’e akordu entre Santa Sé no Governu Timor-Leste, ne’ebé Governu ne’ebé mai tenki fó nia kontinuidade.
“Ohin dadeer, hanesan fó kontinuidade ba akordu anteriór no IX Governu Konstitusionál kontinua aloka millaun $15 ba iha atividade igreja nian. Ba IX Governu Konstitusionál kontinua fó importánsia katak edukasaun ne’e prioridade no importante ba iha ita-nia sosiedade liuliu ita nia Timor-Leste ba oin. Ita hateke ba futuru, ita hateke ba edukasaun, ba ita-nia oan sira no jerasaun foun. Tanba ne’e, mak ami fó apoiu totál ba servisu ne’ebé igreja katólika halo iha Timor-Leste,” Mariano ‘Asanam’ Sabino hateten.
Vise-Primeiru-Ministru hateten, atu rai ne’e ba oin presiza investe ema, entaun papel igreja nian boot tebe-tebes investe iha ema tanba dezde uluk kedas matenek barak hosi eskola katólika, nune’e nafatin kontinua iha papel importante iha setor edukasaun.
Jornalista : Jesuína Xavier
Editór : Cancio Ximenes
