OMS aprezenta sistema saúde hodi fasilita Komisaun F halo fiskalziasaun
DILI, 15 fevereiru 2024 (TATOLI)—Organizasaun Mundiál Saúde (OMS), kinta ne’e, halo aprezentasaun kona-ba Sistema no dezenvolvimentu saúde iha Timor-Leste ba deputadu sira iha Komisaun F trata asuntu Saúde, Seguransa Sosiál no Igualidade iha Parlamentu Nasionál (PN), hodi fasilita halo fiskalizasaun iha terrenu.
Prezidente Komisaun F, Deputada Maria Gorumali Barreto, hateten sorumutu entre Komisaun F ho Organizasaun Mundiál Saúde (OMS) iha Timor-Leste, ho objetivu atu bele habelar liu informasaun no loke diskusaun ida-ne’ebé mak kle’an, no loke mós membru Deputadu Komisaun F nia koñesimentu di’ak liután.
“Tan ne’e ho briefing ne’ebé mai hosi OMS ho nune’e bele ajuda fasilita mós komisaun ho papél ne’ebé iha liuliu ba fiskalizasaun ba área saúde nian bele hatene di’ak liután. Kona-ba moras sira-ne’ebé mosu iha rai-laran no mós kriteira ba iha kompozisaun no rekursu umanu ba iha saúde ho fasilidade saúde ninian, tantu ospitál nasionál, referál, sentru saúde ho postu saúde,” Deputada Maria Gorumali Barreto hateten iha sala GMPTL, iha PN.
Prezidente Komisaun F ne’e hateten, durante sorumutu partilla mós iha asuntu saúde mak sai mós risku ba iha Timor-Leste liuliu ba foinsa’e feto no mane ne’ebé kaben sedu ne’ebé afeta ba saúde reprodutiva.
OMS fó hanoin, iha Timor-Leste ho númeru ne’ebé aas iha kaben sedu, entaun afeta ba mortalidade ba labarik no inan, no iha parte seluk mós impaktu ba má-nutrisaun ne’ebé mak akontese ba labarik no mós inan sira.
Ho problema sira-ne’ebé iha, ba oin, Komisaun F oinsá atu haree didi’ak Ministériu Saúde ninia programa no ezekusaun Orsamentu Jerál Estadu (OJE) nian mo mós bainhira halo fali planu orsamentu tuir mai, Komisaun F bele tau atensaun mós ba iha asuntu saúde ne’ebé mak iha Timor-Leste ne’e presiza tau ita konsiderasaun.
Jornalista : Nelson de Sousa
Editór : Cancio Ximenes
