iklan

JUSTISA, HEADLINE

Tribunál aplika pena prizaun efetiva tinan-neen ba antigu Ministru Constancio Pinto

Tribunál aplika pena prizaun efetiva tinan-neen ba antigu Ministru Constancio Pinto

TDD. Imajen Tatoli /Dok

DILI, 15 fevereiru 2024 (TATOLI) – Tribunál Judisiál Primeira Instánsia Dili (TJPID) iha kinta (15/2) ne’e, liuhosi Juiz ne’ebé ka’er kazu, Juiz Alvaro Maria, lé sai akordaun hodi aplika pena prizaun efetivu tinan neen ba arguidu antigu Ministru Komérsiu Indústria no Ambiente (MCIA) Costâncio Pinto ba krime partisipasaun ekonomia no negósiu tanba faktu sira ne’ebé Ministeriu Públika (MP) aprezenta iha nia akuzasaun durante prosesu julgamentu provadu hotu katak arguidu envolve duni iha krime partisipasaun ekonómia no negósiu.

Nune’e mós, Tribunál deside hodi aplika pena prizaun efetivu tinan lima ba antigu Diretór Jerál MCIA arguidu António da Costa ba krime partisipasaun ekonómia no negósiu.

Liuhosi akordaun, Tribunál mós aplika pena prizaun efetivu tinan haat ba Empreza nain Stard Product Unipessoal Lda arguidu José Deolindo Ximenes no Tribunál haruka hodi devolve fali osan Estadu ho montante $24.000 ne’ebé empreza uza ona.

Nune’e, arguidu José Deolindo Ximenes iha obrigasaun tenke devolve fali osan ne’e ba Estadu iha tinan lima nia-laran tanba arguidu nia aktu ne’e Tribunál konsidera fó ona prezuiju ba Estadu.

Arguidu Costâncio Pinto envolve iha kazu krime partisipasaun ekonómia no negósiu iha tinan 2016, bainhira arguidu sei asume kargu nu’udar MCIA hodi aprova osan subvensaun públika ba empreza Star Prodact Unipesoál Lda, ba projetu resiklajen ne’ebé alinea ho polítika  Governu iha momentu ne’ebá, enkuantu arguidu António da Costa nu’udar antigu Diretór Jerál MCIA no arguidu José Deolindo Ximenes nu’udar nain ba empreza Star Product Unipessoal Lda.

Liuhosi leitura akordaun, Juiz Alvaro hateten, faktu provadu katak arguidu Costancio Pinto envolve iha krime partisipasaun ekonomia no negósiu, iha momentu ministru hodi uza poder ne’ebé iha hodi aprova orsamentu ba empreza Star Product Unipessoal Lda. maibé la iha kontrolu ne’ebé di’ak ba projetu ne’e to’o ikus hamosu prezuiju ba Estadu.

Juiz Alvaro hateten, bazea ba relatóriu hosi levantamentu rai ne’ebé empreza Star Product Unipessoal Lda atu halo projetu resiklajen ne’ebé lokaliza iha Manleuna Aldeia Lisbutak rai ne’e disputa hela.

“Maibé arguidu Costancio lakohi haree relatóriu ne’ebé ninian subornidu sira halo ba nia no uza poder hanesan ministru kontinua autoriza empreza Star Porduct  halo projetu iklui halo mós pagamentu ba empreza ne’e. Haree hosi sirkustánsia sira-ne’e mak Tribunál la iha dúvida hodi konklui tuir faktu sira ne’ebé iha, hodi aplika pena prizaun tinan neen ba arguidu Costancio Pinto ba krime partisipasaun ekonómia no negósiu ne’ebé imputa iha nia akuzasaun”, Juiz Alvaro bainhira lé sai akordaun Tribunal nian ba arguidu Costancio Pinto inklui arguidu rua seluk iha sala julgamentu TJPID, kinta ne’e.

Nia esplika, Tribunál aplika pena efetivu prizaun tinan neen ba arguidu Costancio Pinto tanba Tribunal entende katak arguidu momentu ne’ebá kualidade hanesan ministru MCIA devia rona nia tékniku nia relatóriu ne’ebé halo liuliu ba levantamentu ba rai ne’ebé empreza uza hodi halo projetu resiklajen ne’e.

Maibé hanesan ministru momentu ne’ebá la rona no kontinua avansa selebra kontratu ho empreza Stard Product Unipessoál Lda ba projetu resiklajen inklui autoriza hodi halo pagametu ba empreza refere.

“Tribunál laos haree ba arguidu atu apoia osan subvensaun ne’e, maibé Tribunál entende katak iha kazu ida-ne’e, falta kontrolu no kuidadu iha desizaun sira, ikus mai empreza hetan problema ba rai ne’ebé nia halo projetu ba. No ikus mai projetu ne’e la kontinua to’o empreza abandona servisu sira, nune’e osan ne’ebé Governu apoiu lakon de’it, hodi hamosu fali prezuiju ba Estadu, ho razaun ida-ne’e mak Tribunál la iha duvida hodi hateten aktu arguidu nian ne’e priénse ba elementu krime partisipasaun ekonómia no negósiu”, nia refere.

Nia dehan, ho desizaun ida-ne’e Tribunál hakarak haforsa justisa no nafatin tane justisa signifika justisa laos ba ema ki’ik maibé Tribunál atu dehan katak justisa ne’e ba ema hotu.

Juiz Alvaro salienta Tribunál aplika pena prizaun tinan lima ba arguidu António da Costa tanba momentu ne’e arguidu nu’udar Diretór Jerál MCIA devia fó maske nia hatene maibé arguidu lakohi fó hanoin ba arguidu Constancio atu trava hahalok sira ne’e.

“Maibé arguidu (António da Costa) mós kontribui hodi hosik aktu sira ne’e lao hodi fó biban ba empreza  Star Product kontinua halo pagamentu ba empreza ne’e to’o ikus empreza la konsege finaliza projetu resiklajen no hamosu fali prezuiju ba estadu”, nia afirma.

Enkuantu, Tribunál aplika pena efetivu prizaun tinan haat ba  ba krime Administrasaun danoza arguidu José Deolindo Ximenes, tanba arguidu nia hahalok ne’e nia hatene hela katak rai ne’ebé nia okupa hodi halo projetu resiklajen ne’e iha hela problema, maibé arguidu kontinua halo pedidu ba MCIA atu halo pagamentu ba projetu resiklajen tanba nia halo servisu.

“Ho nune’e projetu ne’e to’o ikus paradu no la kontinua tanba rai ne’ebé empreza Star Product Unipessoal hodi halo projetu resiklajen iha Manleuna iha hela problema. Haree ba sirkustánsia sira ne’e Tribunál la iha duvida aplika pena efetivu prizaun tinan haat ba arguidu José Deolindo Ximenes”, nia salienta.

Entratantu, akuzasaun ne’ebé arrola hosi Ministériu Públiku katak iha loron 19 fulan janeiru tinan 2016, no mos iha loron 09 fulan agustu tinan 2016, arguidu Jose Deolindo Ximenes hato’o tiha ona pedidu husu apoiu orsamentu ho montante $ 200,000.00, hodi halao prosesu produsaun resiklajen ne’ebé tuir planu sei lokaliza iha Aldeia Lesibutak, Suku Manleuana, Postu Administrativu Dom Aleixo no Munisípiu Dili.

Arguidu Jose Deolindo Ximenes hato’o pedidu refere ba ministru komérsiu indústria ambiente altura, arguidu Constancio da Conceição Pinto, iha loron 26 fulan agustu tinan 2016 arguidu refere, hatun despaxu ba pedidu apoiu finansa hodi hato’o husi arguidu Jose Deolindo Ximenes, gabinete komersiál haruka ekipa ida ba halo verifikasaun no rekomenda mai hodi halo aprovasaun.

Hodi nune’e, Diretór Jerál CAEP Manuela G.B. Corte Real hasai despasu hodi nomeia ema nain 11 (sanulu resin ida) hodi halao verifikasaun ba prosesu indústria resiklajen lixu plástiku, maibé ikus mai deteta katak saida maka halo la tuir nia prosesu no regra ne’ebé iha.

Husi hahalok hirak ne’eba, arguidu Antonio da Costa, Arguidu Jose Deolindo Ximenes no arguidu Constancio da Conceição Pinto (eis ministru MCIA) hamosu prejuizu ba orsamentu Estadu ho montante $462,000.00 (dollar amerikanu rihun atus haat neen nulu resin rua, dolar amerikanu, montante orsamentu refere mai husi totál orsamentu fundu subvensaun públika ne’ebé fó ba kompania refere ho valór $289,000.00, inklui kompania ida 10% durante fulan 6 hahú husi fulan janeiru to’o juñu 2018 ho valór osan $28,900.00 fulan 6 = $ 173,400.00.

Arguidu Constancio da Conceição Pinto no arguidu Antonio da Costa hatene katak sira-nia hahalok ne’e kontra ona regra ezekusaun fundu subvensaun públika no sira hatene katak fundu refere labele fó ba pesoa koletivu lukrativa mezmu hanesan ne’e, arguidu sira kontinua fó aprovasaun no mós asina kontratu hodi entrega projetu refere ba arguidu Jose Deolindo Ximenes nu’udar diretór kompania Star Product Unip, Lda.

fundu subvensaun públika tenke uza liuhosi prosesu aprovizionamentu maibé arguidu Constancio da Conceição Pinto no arguidu Antonio da Costa ajudika direta ba kompania Star Product Unip, Lda ho finalidade lukrativa.

Arguidu Jose Deolindo Ximenes nu’udar Diretór Empreza Star Product Unip, Lda. hatene katak nia la merese ba fundu subvensaun públika no nia mós hatene katak rai ne’ebé maka nia utiliza atu hala’o produsaun refere iha hela disputa, mezmu hanesan nia kontinua solisita fundu subvensaun públika no kuandu nia simu fundu refere mak nia kontinua utiliza no ho justifikasaun ne’ebe hanesan de’it, hodi husu tan Estadu hodi halo pagamentu.

Arguidu Jose Deolindo Ximenes sempre hato’o servisu ne’ebé maka nia halao ona no mós kontinua husu tan fundu benefisia nia aan, hodi hato’o falsamente iha relatóriu ba utilizasaun fundu subvensaun públika.

Arguidu sira halo aktu refere ho livre deliberada hatene katak hahalok refere lei bandu no aktu refere krime, maibé sira hakarak fó vantajen ba malu hodi prejudika Estadu.

Ho faktu refere arguidu sira hanesan, Constancio da Conceição Pinto hanesan autór materiál ba krime partisipasaun ekonomia ne’ebé previstu iha artigu 299 husi Kódigu Penál, no arguidu Antonio da Costa nu’udar autór materiál ba krime partisipasaun ekonomia artigu 299 husi Kódigu Penál, no arguidu Jose Deolindo Ximenes nu’udar autór ba materiál ba krime administrasaun danoza ne’ebé previstu iha artigu 274 husi Kódigu Penál.

Audiénsia iha julgamentu ne’e, prezide husi juiz Alvaro Maria, Jose Gonsalves, Arjentino Nunes, MP reprezenta husi prokuradora Lidea Soares, arguidu hetan asisténsia legál husi Advogadu Privadu no Defensór Públika.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!