COVALIMA, 16 fevereiru 2024 (TATOLI) – Sekretáriu munisipál Covalima, diretór munisipál no administradór postu administrativu sira partisipa iha atividade sensibilizasaun matadalan ba elaborasaun Planu Dezenvolvimentu Integradu Munisipál (PDIM) nian.
Sekretáriu Munisipál ba Administrasaun no Finansa, Alberto Moniz de Araújo, informa katak atividade ne’e realiza atu oinsá mak autoridade sira hatene kona-ba elaborasaun PDIM hahú kedas husi suku to’o iha kapital munisípiu, nune’e bele entende nia prosesu sira.
Tanba ne’e, nia dehan prosesu atu elabora PDIM hahú husi suku liuhusi asembleia suku no to’o iha asembleia postu hafoin aprezenta ba munisípiu atu diskute liuhusi reuniaun Konsellu Koordenasaun Munisipál.
Diretór Servisu Munisipál ba Planeamentu Integradu no Dezenvolvimentu, Carlito Barros Reis, reforsa katak ho aprezentasaun matadalan PDIM nian ne’e autoridade sira bele entende prosesu atu submete proposta.
Bazeia ba matadalan fó prióridade ba kada instituisaun hanesan haree ba iha área Edukasaun sei konstrui edifísiu ba profesór, konstrui muru iha eskola, ba Saúde foku ba konstrusaun rezidénsia ba médiku, maibé haree mós ba nia orsamentu.
PDIM implementa projetu ho nia valór orsamentu mínimu rihun $60 to’o $150. Ba Projetu ne’ebé ho nia valór orsamentu liu rihun $150 sei implementa husi Obra Públika Munisípal no projetu ne’ebé ho nia orsamentu rihun $3 realiza husi Programa Nasionál Dezenvolvimentu Suku. Aleinde ne’e, matadalan mós define ona distánsia PDIM konstrui ponte labele liu husi metru 10 ba leten, tenke metru 10 mai kraik.
Tuir dadus 2024, PDIM implementa projetu hamutuk ualu ho totál orsamentu hamutuk $1,350.193.22. Tipu projetu ualu ne’e mak konstrusaun muru haleu Servisu Munisipál Obra Públika no Transporte ho osan $ 83.440,47, rezidénsia ba médiku sira iha suku Holpilat $473.657.35, konstrusaun salaun enkontru Postu Administrativu Fohorem $132.923,43, rekonstrusaun jadín fatin turizmu iha Lakirin, suku Holpilat, postu Maucatar $155.798.80.
Konstrusaun laboratóriu Sentru Saúde Komunitáriu (SSK) Zumalai, iha suku Zulo hamutuk $87.022.60, harii Eskola Bázika Filiál iha suku Matai, postu Maucatar ho verba $87,931.39, konstrusaun kanál irrigasaun iha Bauraikun, iha aldeia Kulu-oan, suku Tashilin, iha postu Zumalai ho osan $192.141 no harii merkadu iha suku Camanasa, iha postu Suai ho verba $137.278,18.
Notísia relevante: Autoridade Covalima hamutuk ho diretór sira diskute kalendáriu implementasaun PAA 2024
Jornalista: Celestina Teles
Editora: Maria Auxiliadora