DILI, 16 fevereiru 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, akompaña Embaxadora Nova Zelándia foun mai Timor-Leste, Hellen Jane Tunnah, hato’o karta kredensiál ba Prezidente Repúblika, José Ramos Horta.
“Akompaña Embaxadora Nova Zelándia foun mai hasoru Prezidente Repúblika hodi hato’o karta kredensiál atu konsolida no reforsa liutan kooperasaun entre ita ho Nova Zelándia,” Ministru Bendito hatete ba jornalista sira iha Palásiu Prezidensiál Dili, sesta ne’e.
Membru governu ne’e dehan, Nova Zelándia nia apoiu mai Timor-Leste hahú kedan iha 2002 to’o ohin loron iha área importante oioin hanesan, seguransa, edukasaun, saúde, agrikultura no seluktan.
“Nova Zelándia nia apoiu mai ita maka’as tebes iha área oioin hanesan seguransa, saúde, agrikultura, edukasaun ba joven sira. Apoiu hirak ne’e liuliu iha baze, hanesan revista Lafaek ne’ebé servisu hamutuk ho CARE internasionál ne’e hetan fundu hosi Nova Zelándia. Sira fó apoiu signifikativu tebes, tulun ita-nia oan sira oinsá atu aprende lee, hakerek,” nia katak.
Ho nune’e Xefe Estadu husu ba Embaxadora foun atu servisu di’ak no hametin nafatin kooperasaun entre nasaun rua.
“Prezidente husu Embaxadora atu servisu di’ak hodi hametin ita-nia relasaun entre nasaun rua. Prezidente mós konvida karik nia atividade vizita Munisípiu Embaxadora hakarak tuir bele atu haree situasaun sira iha baze no liuliu ba atividade sira ne’ebé finansia hosi Nova Zelándia iha área rurál,” nia konklui.
Notísia relevante:Nova Zelándia nafatin apoia Timor-Leste
Jornalista: Hortencio Sanchez
Editór: Rafael Ximenes de A. Belo
