Komisaun A diskute hikas proposta-lei Orden Advogadu-Orden Médiku ne’ebé kaduka

DILI, 16 fevereiru 2024 (TATOLI)—Komisaun A trata Asuntu Justisa no Konstitusionál iha Parlamentu Nasionál (PN), sesta ne’e, diskute fila-fali proposta-lei Orden Advogadu ho Orden Médiku ne’ebé kaduka iha lejislatura dalimak.
Notísia Relevante: Alterasaun lei pensaun vitalísia kaduka bele kontinua iha lejislatura daneen
“Ami haree hela lei balun ne’ebé iha lejislatura dalimak la konsege finaliza hanesan Orden Advogadu, Orden Médiku no Estatutu PDHJ, uluk to’o tiha iha faze iespesialidade maibé la konsege tama iha finál globál,” Prezidente Komisaun A, Deputadu Patrocínio dos Reis Fernandes, hateten ba jornalista sira iha uma fukun PN.
Tan ne’e, ba proposta-lei no projetu-lei ne’ebé kaduka sei hare posibilidade atu bele lori fali ba ka lae, tanba komisaun A la’ós komisaun ida-ne’e halo inisiativa ba lei, insiativa lei tuir konstituisaun no tuir mós rejimentu ne’e Governu no deputadu sira mak aprezenta, nune’e komisaun hein inisiativa hodi bele hala’o diskusaun.
Prezidente Komisaun ne’e hateten, alterasaun estatutu PDHJ ne’e la relevánsia ona hodi halo diskusaun no aprovasaun iha PN.
“Ha’u mai hosi Bankada CNRT, ami haree hela lei sira-ne’e, nune’e bele ko’alia ho deputadu sira Bankada CNRT karik iha posibilidade iha atu bele avansa lei sira-ne’e nu’udar inisiativa foun ka halo fali debate foun,” Deputadu Patrocínio hateten
Diskusaun ba ezbosu lei rua ne’ebé kaduka hanesan Orden Advogadu ho Orden Médiku iha diskusaun ho ideia ne’ebé diferensa, membru komisaun balun hanoin katak lei ne’e avansa hanesan projetu.
“Maibé liuliu hanesan orden médiku ne’e tenke iha ligasaun ne’ebé ho polítika Governu, entaun sei hein insiativa ruma mai hosi Governu karik,” nia hateten.
Hatán kona-ba alterasaun lei pensaun vitalísia ne’ebé kaduka mós iha lejislatura dalimak, Prezidente Komisaun ne’e hateten to’o agora komisaun A seidauk simu inisiativa ruma hosi Deputadu sira atu halo altersaun ba lei pensaun vitalísia.
“Tanba to’o agora seidauk iha inisiativa balun tama iha komisaun, entaun ha’u labele hateten buat ida atu tau saida ba prioridade. Tanba, inisativa la’ós mai hosi komisaun maibé komisaun A hanesan dapur para atu tein de’i. Insiativa tenke mai hosi Deputadu sira,” nia hateten.
Mezmu nune’e, nia hateten, komisaun A iha ona preparasaun tékniku hosi parte asesór sira haree hela kona-ba posibilidade oinsá mak atu halo altersaun ba lei pensaun vitalísia ne’e.
“Karik altera lei pensaun vitalísia ne’e iha parte saida-saida, nune’e parte tékniku nian hanesan asesór sira haree hela no finaliza ona mak ami sei oferese hanesan materia ou referensia ka ezbosu ba Deputadu sira hotu para sira bele haree. Nune’e, deputadu sira bele sai hanesan inisiatór hodi halo insiativa sai hanesan projetu ida,” nia dehan.
Jornalista : Nelson de Sousa
Editór : Cancio Ximenes

