PM husu Prezidente INSS ho estrutura serví povu ho domin
DILI, 16 fevereiru 2024 (TATOLI)–Primeiru Ministru (PM), Kay Rala Xanana Gusmão, sesta ne’e, partisipa tomada pose ba Prezidente no membru Konsellu Administrasaun Institutu Nasionál Seguransa Sosiál (INSS) no Fundu Rezerva Seguransa Sosiál, ba mandatu tinan-tolu, ne’ebé iha biban hanesan husu ba emposadu atu serví povu ho domin.
“Ha’u laiha liafuan barak atu hato’o ba imi, maibé husu de’it imi sira ne’ebé ohin simu ona pose ba períodu 2024-2026, atu servisu ho di’ak, hanoin kbiit laek, jere osan povu nian ho di’ak hodi evita korupsaun no má jestaun nune’e lolo liman ba sira ne’ebé presiza,” Xefe Governu hato’o liuhosi diskursu abertura ba serimónia tomada pose, iha salaun Ministériu Solidaridade Sosiál no Inkluzasaun (MSSI), Caicoli.
Estrutura INSS ne’ebé ohin simu pose mak hanesan Arlindo Pinto nu’udár Prezidente INSS, Dulce Natividade Fátima da Cunha no Solange de Fátima Borges nu’udar Responsável ba Solidariedade Sosiál, Sansão Gomes Reprezenta Empregadór sira, no Almério Vila Nova Gouveia Reprezenta Traballadór Timor-Leste, ne’ebé sira ne’e hotu nu’udár mós vogál ba Konsellu Adminstrasaun Institutu Nasionál Seguransa Sosiál.
Notísia relevante : Arlindo Pinto nomeadu hanesan Prezidente Konsellu Administrasaun INSS
Nia dehan, MSSI nu’udar instituisaun ne’ebé atu haree ba katuas ferik, kbiit laek no seluk tan ne’ebé presiza Governu nia tulun, la’ós de’it osan maibé domin. Nune’e Governu hamosu INSS ne’e hodi tau-matan ba sira.
“Ha’u husu imi tenke servisu ho laran atu katuas ferik no povu sira iha área rurál hotu bele sente no simu sira-nia direitu, lae sira ne’ebé iha área rurál ohin loron balun la sente ukun-an, nune’e ha’u husu imi-nia kompromisu atu serví ho laran nune’e ita-nia povu bele sente ukun-an ida ne’e,” nia fó hanoin.
Xefe Ezekutivu husu ba estrutura emposadu atu servisu ba povu no labele hili malu, nune’e bele lori dezenvolvimentu ba oin tanba bainhira servisu hili malu sei hamosu des-igualdade.
Jornalista : Arminda Fonseca
Editora : Julia Chatarina
