DILI, 15 fevereiru 2024 (TATOLI) – Ministru Negósiu Estranjeiru no Kooperasaun (MNEK), Bendito Freitas, hateten, dialogu entre Governu Timor-Leste ho Uniaun Europeia (UE) ko’alia liu kona-ba kooperasaun ne’ebé mak parte rua halo ona iha tinan hirak ba kotuk to’o ohin loron.
“Reuniaun ne’ebé ita hala’o ho Uniaun Europeia ba dala hitu, nu’udar mós dialógu atu haree kona-ba ita-nia kooperasaun iha área polítika, sosiál, ekonomika no investimentu ba iha komersiu. Asuntu hirak ne’e ita sente importante tebes ba Timor-Leste,” Bendito ko’alia ba jornalista sira iha edifísiu MNEK, Praia dos Coqueiros, Dili, kinta ne’e.
Tuir xefe diplomata ne’e, UE hanesan parseiru importante ida ba Timor-Leste tanba kooperasaun hahú tempu naruk to’o ohin loron.
“Uniaun Europeia parseiru ida-ne’ebé importante tebes ba Timor-Leste durante konstrusaun Estadu to’o ohin loron. Dialógu parseria ne’ebé realiza atu hametin liutan kooperasaun,” ministru ne’e afirma.
Hahú parte rua halo kooperasaun, UE apoiu liu iha área, saúde, edukasaun, infraestrutura no seluktan.
Dadaun ne’e Timor-Leste hasoru problema globál hanesan ekonomia, seguransa, direitu umanu, dijitalizasaun. Tanba ne’e, ba oin Timor-Leste sei presiza tulun hosi UE iha área ne’ebé temi ona.
Iha fatin hanesan, Deputy Managing Director of Asia Pacific at the European External Action Service, Paula Pampoloni hateten, dialógu entre UE ho Governu Timor-Leste importante tebes atu nune’e bele hametin liutan kooperasaun entre parte rua.
“Dialógu ida ne’e hanesan parte ida atu hametin liutan kooperasaun entre Uniaun Europeia ho Timor-Leste. Importante tebes ba ita atu hametin kooperasaun iha área dezenvolvimentu ekonomia, dezenvolvimentu ba enerjia renovavél, infraestrutura nasaun nian no seguransa,” Paula hateten.
Nia dehan, UE reafirma kontinua apoiu Timor-Leste iha área saida de’it nune’e bele dudu dezenvolvimentu nasaun nian ba oin ho lais liu, liuliu iha dezenvolvimentu ekonomia.
“Dialógu ida ne’e Uniaun Europeia ho Governu Timor-Leste atu koko esplora liutan saida mak bele halo tan ba oin. Ami kompromete atu apoiu nafatin Timor-Leste nia dezenvolvimentu iha setór oioin,” nia kompromete.
Jornalista: Hortencio Sanchez
Editór: Rafael Ximenes de A. Belo
