iklan

EDUKASAUN, MANATUTO

Servisu Edukasaun Manatuto aloka rihun $135 konstrui dapur EBC 18

Servisu Edukasaun Manatuto aloka rihun $135 konstrui dapur EBC 18

Aktividades estudadantes eskola KAFE Manatuto iha tempu rekreu, kuarta 8 juinu 2022.Imajen Tatoli/Antonio Daciparu

DILI, 16 fevereiru 2024 (TATOLI)–Diretór Servisu Edukasaun munisípiu Manatuto, Patrício da Cruz Quintão, hateten tinan ne’e Srvisu Edukasaun Manatuto SEMM aloka rihun $135 ba konstrusaun dapur Ensinu Báziku Sentru (EBC) hamutuk 18.

“Iha tinan 2024, sei iha konstrusaun ba dapur eskola nian hodi apoiu programa eskolár hamutuk 18 ba EBC iha munisípiu Manatuto inklui EBC Katólika rua (2) ho orsamentu ba kada dapur ida $7.500, mak ho totál orsamentu $135.000,” Diretór Servisu Edukasaun ne’e hateten ba Agência Tatoli liuhosi telefónika, sesta ne’e.

Responsável ne’e hateten, orsamentu ba konstrusaun dapur 18 ne’e maihosi fundu orsamentu transferénsia públika.

Ba tinan ida-ne’e, tuir nia, Servisu Edukasaun Manatuto iha planu no sai mós prioridade Ministériu Edukasaun (ME) nian mak sei konstrui edifísiu Ensinu Pre-Eskolár (EPE) rua (2) ne’ebé oras ne’e tama ona iha prosesu levantamentu dadus hodi halo Planta no kadernu Enkargu (Bill of Quallity-BoQ).

“edifísiu Ensinu Pre-Eskolár (EPE) PE rua mak EPE Hatulelo iha suku Orlalan, postu administrativu Laclubar ho EPE 7 de Setembru iha suco Uma Naruk, postu Laclo nian. EPE rua ne’e, foin tama iha levantamentu dadus hodi halo BoQ no deside nia orsamentu,” nia dehan.

Entretantu ko’alia kona-ba profesór, nia dehan, EPE públika neen (6) nia profesór mak kontratu termina ona maibé prosesu hanorin kontinua la’o normál tanba profesór sira hetan kontratu hosi orsamentu munisipál nian.

“EPE 6 ne’e, sira kontinua hanorin tanba kontinua hetan kontratu ba fulan neen nian hosi orsamentu munisipál nian, hodi hein rekrutamentu no kolokasaun hosi ministériu liuhosi bolsa kandidatu ne’ebe oras ne’e nia prosesu la’o hela,” nia dehan.

EPE neen (6) mka EPE Horta Cairui iha postu Laleia, EPE Iliheu iha Manatuto, EPE Hatumetak iha postu Laclo, EPE 7 de Setembro iha postu Laclo, EPE Cribas iha Manatuto no EPE Hatulelo  iha postu Laclubar.

Totál profesór kontratadu iha 2023 ne’ebé termina sira-nia kontratu iha 31 dezembru 2023 hamutuk 62.

Maske nune’e, eskola kontinua la’o normál tanba eskola balun inan-aman sira hakarak halo kontribuisaun hodi selu no hein kolokasaun hosi ME ne’ebé oras ne’e rekruta hela liuhosi vaga Bolsa Rekrutamentu ka Kandidatu.

“Totál aplikante bolsa kandidatu ba munisípiu Manatuto ne’ebé submete sira-nia dokumentu hamutuk 247 ne’ebé kompostu hosi mane hamutuk 86 no feto 161,” nia hateten.

Iha tinan 2022, totál projetu komunitáriu hamutuk 10 ho totál orsamentu ba projetu hirak-ne’e $871.294,71 no finaliza hotu ona, no projetu balun hein de’it avaliasaun hosi parte Ajénsia Dezenvolvimentu Nasionál (AND) antes entrega ba Eskola.

Tinan 2023, iha projetu komunitáriu hamutuk ualu (8) mak konstrusaun edifísiu EPE lima (5) no Ensinu Báziku tolu (3) ho totál orsamentu $763.31,00, inklui konstrusaun foun EBC Abat Oan ne’ebé hala’o lansamentu fatuk dahuluk iha semana kotuk, ho totál ba konstrusaun $107.657.98.

Jornalista : Osória Marques

Editór       : Cancio Ximenes

iklan
iklan

Leave a Reply

iklan
error: Content is protected !!