Servisu MAPPF Viqueque sujere empreza aselera reabilitasaun irrigasaun Belia 1-2 Uatulari
VIQUEQUE, 17 fevereiru 2024 (TATOLI)–-Dirijente Servisu Ministériu Agrikutura, Pekuária, Peska no Floresta (MAPPF) Viqueque, sujere empreza responsável atu aselera projetu reabilitasaun ba irrigasaun iha postu administrativu Uatulari, munisípiu Viqueque.
“Ami sujere empreza Saerobu Unip, Lda aselera projetu reabilitasaun ba irrigasaun Belia 1,2 iha postu Uatulari, atu nune’e fulan oin (marsu) bele hatama bee ba natar hodi agrikultór sira bele halai sira-nia natar,” Diretór Servisu MAPPF munisípiu Viqueque, Joaquim Fernandes, hateten ba Agência Tatoli, iha postu Viqueque Vila, sábadu ne’e.
Notísia relevante : Agrikultór Uatulari husu empreza aselera projetu reabilitasaun irrigasaun Belia
Ekipa kompostu hosi Servisu MAPPF Viqueque, Programa Dezenvolvimentu Nasaun Unida (UNDP, sigla inglés), Enjiñeiru Planu Dezenvolvimentu Integradu Munisipál (PDIM) Viqueque no responsável empreza Saerobu, iha sesta ne’e, halo observasaun direta hodi haree progresu projetu.
“Ekipa fó orientasaun ba empreza hodi aselera serbisu tanba durante ne’e ita-nia natar na’in sira mós preokupa ba serbisu empreza nian ne’ebé paradu, tanba ne’e ekipa sira bá haree diretamente,” nia akresenta.
Antes ne’e, Diretora empreza Saerubu Unip Lda, Maria da Silva Fernandes, kompromete sei halo esforsu hodi aselera serbisu, nune’e bele finaliza iha fulan-fevereiru nia-laran.
Bazeia ba relatóriu ne’ebé fó sai hosi PDIM, progresu projetu reabilitasaun ba irrigasaun Belia 1-2 atinje 35%.
Projetu ne’e ho kustu $74.948,96, ho naruk kilómetru 1,5, ne’ebé fornese bee ba natar ektare 442
Jornalista : Vitorino Lopes da Costa
Editora : Julia Chatarina
