Komponente Terrestre Sikone Oé-Cusse presiza karreta
OÉ-CUSSE, 19 fevereiru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, hala’o vizita ofisiál ba iha postu FALINTIL-Forsa Defeza Timor-Leste (F-FDTL), Komponente Terrestre iha Sikone, suku Lalisuk sub-rejiaun Pante Makassar.
Iha vizita ofisiál ne’e, Prezidente Autoridade ne’e, identifika iha komponente terrestre postu Sikone enfrenta hela problema estrada no presiza aumenta karreta.
Notísia relevante:PDHJ oferese formasaun direitu umanu ba F-FDTL postu Oé-Cusse
Lobato, hateten, vizita ofisiál ne’e importante, atu haree no observa direita kondisaun reál, ba seguransa sira, nune’e iha futuru bele buka solusaun, tanba F-FDTL nu’udar lutu nasaun presiza kria kondisaun dignu.
“Ha’u mai iha-ne’e, ha’u haree dezafiu barak, maibé la’ós boot, ida mak estrada, ha’u fó ona orden ba Obra Públika, atu IGE bele tama iha-ne’e, para iha semana ne’e komesa hadi’a estrada ne’e, tanba sira halo hela obra balu iha postu, entaun karreta tenke lalin sasán konstrusaun nian, nune’e fasilita transporte sira labele iha problema,” Rogério Tiago Lobato, ba jornalista sira hafoin hala’o visita ofisiál.
“Ha’u mós hetan dezafiu ida, sira kontijente ida hala’o servisu ba territóriu Oé-Cusse boot tebes, maibé ho karreta ida de’it, hanesan Estadu ita labele ejize ba servidór Estadu liuliu FDTL ho PNTL atu servisu ho di’ak, kuandu sira ita la fó meiu atu hala’o servisu, ohin ha’u rasik mai haree ho matan, ne’ebé buat sira-ne’e presiza rezolve, iha IX Governu iha vontade polítika atu haree situasaun sira-ne’e atu-bele rezolve,” nia informa.
Tanba ne’e, atu solusaun problema rua ne’e, naturálmente F-FDTL no PNTL, tutela direita ba iha Governu Sentrál, depende ba iha Ministériu Defeza ho Ministériu Interiór, maibé hanesan Prezidente Autoridade RAEOA, sei fó hanoin Ministru Defeza no Interiór kona-bá asuntu rua ne’e.
“Maibé ita tenta buka dalan importante mak ne’e, sira tenke iha meiu atu servisu no hetan solusaun lais, tanba ita labele ejize dehan tenke servisu, kuandu sira meiu laiha, dalaruma atu ba de’it rai dook labele tanba karreta ida de’it, ne’ebé ami haree situasaun ne’e, ha’u sente katak, iha vontade polítika hosi IX Governu atu fó solusaun, ne’ebé ho lais.”
Notísia relevante: Falur observa kondisaun Komponente Navál ne’ebé destaka iha RAEOA
Entretantu, totál membru F-FDTL iha iha postu Sikone hamutuk na’in-28, komposta hosi membru na’in-24 no dirijente na’in-haat (4).
Jornalista: Abílio Elo Nini
Editór: Evaristo Soares Martins
