iklan

POLÍTIKA

Bankada Parlamentár aprezenta membru Deputadu ba komisaun eventuál ASEAN

Bankada Parlamentár aprezenta membru Deputadu ba komisaun eventuál ASEAN

Logotipu ASEAN. Imajen/Espesiál

DILI, 19 fevereiru 2024 (TATOLI)—Bankada Parlamentár kompostu husi PD, KHUNTO no PLP aprezenta membru Deputadu ba komisaun eventuál akompañamentu prosesu adezaun Timor-Leste ba Asosiasaun Nasaun Sudeste Asiátiku (ASEAN).

Notísia Relevante: PN kria komisaun eventuál akompaña prosesu adezaun TL ba ASEAN

Sekretária Meza PN, Deputada Virginia Ana Belo, fó sai bankada Parlamentár tolu nia reprezentasaun ba komisaun eventuál Parlamentu Nasionál ba meza PN.

“Bankada PD hosi Deputada Maria Teresa Gusmão nu’udar membru efetivu no Deputadu Armando dos Santos Lopes membru suplente. Bankada KHUNTO hosi Deputadu Luis Roberto hanesan membru efetivu no Deputada Irene Gonzaga Sarmento membru suplente. Bankada PLP hosi Deputadu Abel dos Santos membru efetivu no Deputada Maria Angelina Sarmento membru suplente,” Sekretária Meza PN ne’e lee sai karta hosi bankada Parlamentár iha reuniaun plenária PN, segunda ne’e.

Entretantu, iha plenária ne’e seida’uk fó sai membru Deputadu husi bankada Parlamentár CNRT ho FRETILIN.

Antes ne’e iha loron 12 fevereiru 2024, PN liuhusi reuniaun plenária aprova projetu rezolusaun Parlamentu Nasionál númeru 30/VI(1a) Kria Komisaun Eventuál Akompañamentu Prosesu Adezaun ba Asosiasaun Nasaun Sudeste Asiátiku (ASEAN) ho rezultadu votasaun a-favór 56, kontra no abstensaun 0.

“Nune’e pasa. Ne’ebé husu bankada parlamentár indika nia membru hodi bele forma meza hodi ita hato’o ba Governu no bainhira Sekretária ASEAN mai ita mós prepara ona novidade di’ak ba Parlamentu hotu-hotu katak, Timor-Leste espesífiku, ita iha preokupasaun ida ne’e,” Prezidente Parlamentu Nasionál, Maria Fernada Lay, hateten iha sala plenária PN.

Projetu rezolusaun ba kriasaun komisaun eventual ne’e rekoñese importánsia no potensiál benefísiu adezaun Timor-Leste (TL) ba ASEAN.

Konsidera númeru inisiativa lejislativa no instrumentu internasionál hosi kompeténsia PN nian ne’ebé nesesáriu atu aprova iha ámbitu prosesu adezaun ba ASEAN, nu’udar nesesidade kumpre prosedimentu prazu previstu iha roteiru.

Komisaun eventual ne’e estabelese mekanizmu espesífiku hodi garante partisipasaun ativa no efikás PN iha ámbitu prosesu adezaun.

Kompete ba komisaun eventuál ne’e mak akompaña atividade Governu iha ámbitu prosesu adezaun TL ba ASEAN no elabora, submete apresiasaun iha plenária PN, relatóriu, paresér no projetu-lei ou rezolusaun ne’ebé konsidera pertinente ba prosesu adezaun, no promove koordenasaun entre PN ho instituisaun nasionál ne’ebé envolve iha prosesu adezaun TL ba ASEAN.

Mandatu komisaun eventuál funsiona durante períodu lejislatura ou termina iha data ne’ebé konklui ona prosesu adezaun TL ba ASEAN.

Kompozisaun komisaun eventual kompostu hosi Deputadu na’in-ualu (8), indika hosi bankada parlamentár sira  hanesan CNRT iha na’in-tolu (3), FRETILIN na’in-rua (2), PD ida (1), KHUNTO ida (1) no PLP ida (1).

Meza komisaun eventuál nian kompostu hosi prezidente ida (1), vise prezidente ida (1) no sekretáriu ida (1).

Komisaun eventual ne’e aprezenta hosi proponente Deputadu CNRT, Patrocínio dos Reis Fernandes, Deputadu FRETILIN, Aniceto Longuinhos Guterres Lopes, Deputadu PLP, Helder Freitas ‘Kamarudi’ no Deputadu PD, Manuel Hernique Noronha.

Jornalista : Nelson de Sousa  

Editór        : Cancio Ximenes

iklan
iklan

Leave a Reply

iklan
error: Content is protected !!