DILI, 19 fevereiru 2024 (TATOLI) – Diresaun Nasionál Floresta husi Ministériu Agrikultura, Pekuária, Peska no Floresta (MAPPF) apela ba populasaun iha territóriu, liuliu iha Dili atu labele sunu rai no tesi ai arbiru iha área ne’ebé risku ba rai monu no inundasaun.
Diretór Nasionál Floresta, Guilhermino Moniz, hatete sira alerta ona ba komunidade sira atu iha konsiénsia hodi evita aan tesi ai no kuidadu ambiente sira, tanba daudaun kuaze iha foho ai-hun boot sira komesa laiha ona no sei fó impaktu ba ema.
“Husu konsiénsia komunidade sira ne’ebé hela iha área sira ne’ebé risku ne’e la’ós atu tesi no sunu ai, maiée tenke hatene mós oinsá bele kuda fali”, dehan iha Colmera, ohin.
Nia salienta katak iha komunidade barak ne’ebé hela iha fatin sira ne’ebé risku no to’o agora seidauk iha konsiénsia, tanba kontinua tesi no sunu ai sira ne’ebé moris iha foho leten, iha bee-matan no mota ninin sira, tanba ne’e mak kada tinan udan bosok de’it sempre hamosu inundasaun iha populasaun nia leet.
Tanba ne’e, diresaun ninia obrigasaun mak sei halo sensibilizasaun ba populasaun, liuliu iha Dili, iha área Cristu Rei, Camea, Becusse no parte Dare nian, inklui Maloa atubele hetan informasaun detalla, nune’e bele evita aan labele sunu no tesi ai iha área sira ne’e, tanba kada tinan sempre akontese inundasaun ne’ebé fó risku boot ba populasaun sira iha kapitál.
“Kuaze iha foho sira ai boot barak maka monu hotu ona. Udan mai dudu rai-teen sira tun hotu mai tetuk, tan ne’e ita presiza komunidade, liuliu iha kapitál atu hatene kuidadu ambiente hodi la bele fó risku ba ema seluk”, realsa.
Diresaun Nasionál Floresta nia orsamentu ba tinan ne’e hamutuk rihun $200-resin, maibé orsamentu ne’e aloka barak liu ba operasionál, entaun programa Diresaun Nasionál Guarda Florestál nian ne’e atu halao atividade sensibilizasaun informasaun kona-ba impaktu husi inundasaun ba komunidade ne’e la másimu, maibé diretór ne’e dehan ba tinan oin sei halo esforsu hodi aloka verba sufisiente atubele realiza programa ne’e ho di’ak liután.
Miguel Cérceres ne’ebé hela iha Darlau, iha Becora Mota-ulun husu ba Governu atu halo atividade sosializasaun ba abitante sira ne’ebé hela iha fatin refere hodi evita tesi no sunu rai.
“Karik hakarak tesi no sunu ai tenke kuda uluk ai ruma depois mak bele tesi ai sirane’ebé tuan ona. La’ós bá tesi de’it, ikus mai kuandu mosu inundasaun komunidade sira hela iha rai tetuk mak sofre”, afirma.
Notísia relevante: Diresaun florestrál halo apreensaun mákina tesi ai iha Baucau
Jornalista: Tomé Amado
Editora: Maria Auxiliadora
