DILI, 19 fevereiru 2024 (TATOLI) – Governu daudaun ne’e planeia ona atu alarga tan espasu merkadu Manleuana ne’ebé la sufisiente atu akumula vendedór sira hodi hala’o sira-nia atividade ekonómika.
Diretór Servisu Munisipál Jestaun Merkadu no Turizmu Autoridade Munisípiu Dili, Arthur Henriques, informa, Governu sosa rai ektar rua iha merkadu Manleuana nia kotuk atu alarga merkadu, tanba sei muda vendedór sira ba iha ne’ebá.
“Governu iha planu atu muda vendedór sira husi eis-merkadu Comoro ba merkadu Manleuana, tanba ne’e mak sosa hela rai ektar rua ho balun atu halo alargamentu. Rai iha merkadu Manleuana nia kotuk purvolta ektar rua ho balun; ne’e agora prosesu la’o hela. Entaun Sekretáriu Estadu sei rezolve hela rai ne’e, ami sei muda tama hotu sira (vendedór) ba laran,” Diretór Arthur Henriques ba Tatoli, iha AMD Matadooru, ohin.
Diretór ne’e hateten, merkadu Manleuana sei iha balkaun hamutuk atus ida resin ba negosiante sira husi Rotunda Comoro, eis-merkadu Comoro, Elemloi sira.
“Sira-nia razaun ne’e ema la sosa sira-nia produtu. Tanba ne’e, tuku lima lorokraik sai hosi merkadu Manleuana depois konsentra iha merkadu eis Comoro nian no seluktan,” nia relata.
Arthur Henriques esplika, Governu prepara hela kondisaun ba futuru, tanba ne’e mak haree hela rai ektare rua ho balun ne’e ba vendedór sira namkari iha área Elemloi kampu Baru no eis-merkadu Comoro.
Iha biban ne’e, Diretór ne’e mós lamenta katak vendedór sira laiha kuidadu ba kondisaun sira ne’ebé Governu prepara, tanba ba soe fo’er arbiru, uza bee haris-fatin hodi haris no fase roupa.
“Vendedór sira tenke prezerva kondisaun ne’ebé prepara hosi Governu no eduka sira-nia aan ba uzu fasilidade públiku”, nia sujere.
Ezekutivu ne’e observa, fatin iha merkadu Taibessi laiha ona atu vendedór sira ba iha ne’ebá, tanba fatin ne’ebá munisípiu hothotu mai konsentra iha ne’ebá.
Ho planu alarga Merkadu Manleuana ne’e, Vendedora Bendita Soares ne’ebé durante fa’an sasan iha eis-merkadu Comoro ne’e, hateten, nia rasik rona ona informasaun katak Governu atu muda sira ba fa’an iha merkadu Manleuana, tanba Governu hakarak hadi’a estrada ba transporte númeru 13 hodi halai.
“Atu muda maibé lahatene loos. Ida ne’e ema atu loke dalan ba mikrolet 013. Muda ami ba fatin ne’ebá; merkadu Manleuana, maibé ema bainhira rejistu ba hotu ne’ebá ne’e ema barak,” nia konsidera.
Vendedora ne’e lamenta, se muda ema negosiante sira ba hotu merkadu ne’e ladi’ak, tanba nia iha esperiénsia ema rua fa’an iha balkaun ida, espasu ki’ik.
Iha fatin hanesan, Vendedora Olandina dos Santos mós sujere ba Governu katak se muda sira ba merkadu Taibesi no Manleuana, presiza kria kondisaun, tanba laiha fatin sufisiente ba ema hotu.
“Se hasai ema tenke halo tiha kedas konstrusaun ruma. Labele husik ema fila mai iha ne’e fa’an no balun fa’an iha merkadu Manleuana lafolin fila mai iha ne’e”, nia husu.
Tuir observasaun Tatoli, iha eis-merkadu Comoro katak, vendedór sira fa’an produtu lokál hanesan modo, ai-fuan, fehuk-midar, talas, ai-farina, seluktan inklui roupa uzadu ka obralan.
Iha observasaun ne’e nota mós katak laiha kondisaun ijiéne iha eis-merkadu Comoro, tanba laiha kanalizasaun bee, laiha bee-dalan, lixu namkari ba mai iha Estrada, taho dodok ho iis forte ne’ebé prejudika saúde publika ema nian.
Jornalista : Felicidade Ximenes
Editór: Rafael Ximenes de A. Belo
