iklan

INTERNASIONÁL, DILI, HEADLINE

USAID iha kompromisu apoia TL hametin valór demokrásia no kombate korrupsaun

USAID iha kompromisu apoia TL hametin valór demokrásia no kombate korrupsaun

Imajen/Espesial

DILI, 19 fevereiru 2024 (TATOLI) – Estadu Unidu Amérika (EUA) liuhosi nia-Ajénsia ba Dezenvolvimentu Internasionál (USAlD, sigla inglés) ho parseria Ajénsia Dexis ho orgulu anunsia kolaborasaun ba programa foun ne’ebé kria ho naran “Atividade Mekanizmu Responsabilidade no Integridade,” foku ba promosaun responsabilidade no reforma anti-korrupsaun iha Timor-Leste.

“Ami fiar iha forsa responsabilidade no transparénsia nian, atu harii baze ba demokrásia ne’ebé progresivu. Fó impaktu ba ema mak importante liu, no atividade foun ida ne’e mak prova ida ba kompromisu Governu Estadu Unidu nian atu empodera povu Timor-Leste,” hateten Diretór Interinu USAID iha Timor-Leste, Mark White ba jornalista sira iha Dili, ohin.

Programa ne’e ho objetivu atu empodera instituisaun xave Timoroan sira nian, hametin sistema demokrátiku atu lori Timor-Leste sai nasaun ida ne’ebé inkluzivu, prosperu, no saudavel ba joven sira, ne’ebé ninia númeru aumenta ba bebeik.

Iha programa ne’e, Ajénsia Dexis sei servisu hamutuk ho sosiedade sivil, Governu no Parlamentu Timor-Leste nian atu hametin kapasidade estratéjiku, institusionál, komunikasaun, no koordenasaun ho instituisaun xave sira ne’ebé servisu ba área responsabilidade nian, espesialmente Komisaun Anti-Korrupsaun, Provedoria ba Direitu Umanu no Justisa, no Kâmara Auditória.

Atividade ne’e hala’o tanba hetan fundu inisiál tinan tolu ho valór millaun $7.9, ne’ebé atribui ba Dexis, hanesan pasu importante ida iha USAID ninia apoiu foun ba assuntu demokrásia iha Timor-Leste.

Independénsia instituisaun ne’ebé halo supervizaun ho dezenvolvimentu polítika lejizlativa no Governu nian ne’ebé di’ak sei ajuda sidadaun sira bele asegura transparánsia no responsabilidade Governu nian.

“Ami apresia ba konfiansa ne’ebé USAID fó ba Dexis ho atribuisaun ida ami espera atu servisu hamutuk ho feto no mane Timor-oan sira hotu atu promove responsabilidade no tranparánsia boot liu ba futuru di’ak liu nasaun joven ida ne’e,” hatete Xefe Ezekutivu ka CEO Dexis, Mihir Desai.

Rekorda fali katak Embaxadór Estadu Unidu Amerika (EUA) kontribui ona osan hamutuk millaun $92 entre 2021 no 2025 hodi hadi’a ekonomia Timor-Leste nian no promove Governasaun di’ak.

USAID lansa “avansa SAN”

Alende ne’e, USAID anúnsia lansamentu hosi projetu Avansa Sistema Ai-han no Nutrisaun (Avansa SAN), inisiativa foun ho valor millaun $15 ho durasaun tinan lima atu hadi’a Timor-Leste ninia sistema ai-han hodi hadi’a nutrisaun no reforsa seguransa ai-han iha munisípiu Aileu, Ainaro, Dili, no Ermera.

Avansa SAN sei apoia inisiativa agrikultura ne’ebé adapta ho klíma, promove diversifikasaun aihan, fortalese empreza agro-alimentar kiik no média, hadi’a konsiensia komunidade konaba diversidade diétika, no fó estímulu ba adopta prátika saudável atu hadi’a moris di’ak no nutrisaun.

Avansa SAN mós sei fó asisténsia foku ba agrikultór kiik no feto sira, espesiálmente inan isin rua ho labarik tinan lima mai kraik, atu aumenta disponibilidade, asesibilidade, afordabilidade, no konsumsaun diétika saudável, espesiálmente ba feto no labarik.

“Ho lansamentu atividade Avansa SAN, USAID orgullu atu apoia prioridade desenvolvimentu Timor-Leste nian liuhosi hadi’a sistema ai-han no nutrisaun, espesiálmente ba feto no labarik sira, ami nia objetivu mak atu harii resilénsia no kontribui ba futuru ne’ebé saudável liu. Inisiativa ida ne’e hatudu ami nia kompromisu ba parseria no sustentabilidade,” hateten Diretór Interinu USAID ne’e.

Foku ba hadi’a nutrisaun no seguransa ai-han, Avansa SAN sei kontribui ba objetivu dezenvolvimentu nasaun nian no iha aliñamentu ho prioridade nasionál Timor-Leste nian.

USAID kontente atu kontinua kolaborasaun ho Governu Timor-Leste iha nivel nasionál no lokál atu aseleira fortalesimentu sistema ai-han lokál.

Hahú Timor-Leste independensia to’o ohin loron EUA ho nia ajénsia sira iha Timor-Leste kontribui ona millaun $323 hodi promove no dezenvolvimentu inkluzivu pasifiku atu nasaun ne’e prosperu, saudavél no autosufisiente.

TL sa’e pozisaun hitu iha índise persepsaun korrupsaun

Entretantu tuir dadus, Timor-Leste mantein tendénsia husi tinan sira ikus iha kombate ba korrupsaun, ne’ebé sa’e ba pozisaun da-70 (iha tinan kotuk iha pozisaun 77) tuir índise Persesaun Korrupsaun, (CPI, sigla inglés) ne’ebé elabora husi organizasaun naun governamentál (ONG) Transparénsia Internasionál, hodi alkansa pontu 43, tuir relatóriu ne’ebé fó-sai iha loron 30 fulan-janeiru liubá.

Durante tinan lima ikus ne’e, Timor-Leste sa’e pozisaun hitu iha CPI, destaka liután iha tinan sanulu-resin-ida ikus ne’e, ho aumentu totál pozisaun 10. Rezultadu ida-ne’e halo nasaun ne’e nafatin okupa pozisaun iha metade dahuluk ho nivel korrupsaun menus hosi país sira iha rejiaun Ázia-Pasífiku.

Entre nasaun sira iha ASEAN, Singapura (5) no Malázia (57) de’it mak iha Timor Leste nia leten no entre nasaun sira membru CPLP nian, Cabo Verde (30), Portugal (35) no São Tomé e Príncipe (67) de’it maka sira nia pozisaun iha Timor-Leste nia leten.

CPI maka ferramenta medisaun ba korrupsaun ne’ebé tuan no kompleta liu iha mundu, ne’ebé analiza nivél korrupsaun iha setór públiku husi nasaun no territóriu 180, hodi fó valór ba sira husi 0 (ne’ebé konsidera korruptu tebes) to’o 100 (transparente tebes), tuir persesaun  husi espesialista no ezekutivu negósiu nian sira kona-ba nivel korrupsaun iha setór públiku.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!