DILI, 20 fevereiru 2024 (TATOLI) – Embaxaidór Brunei Darussalam mai Timor-Leste, Wan Hadfi Lutfan, informa, Estadu Brunei Darussalam hakarak koopera ho Timor-Leste hodi dezenvolve setór edukasaun no petróleu no gas atu bele dudu ekonomia rai laran.
Diplomata me’e hato’o kompromisu ne’e hafoin hasoru malu ho Xefe Estadu, Ramos Horta, tersa ne’e, iha palasiu Presidensial, Bairru-Pite.
“Ohin, ha’u hasoru malu ho Prezidente Repúblika ko’alia kona-ba kooperasaun atu dezenvolve setór edukasaun, petróleu no gas atu nune’e bele hasa’e kresimentu ekonomia nasaun nian,” Embaxaidór ne’e hatete ba jornalista iha Palásiu Prezidensiál Dili, tersa ne’e.
Kooperasaun iha área petróleu no gas importante tebes tanba Timor-Leste iha rekursu minerál ne’ebé presiza dezenvolve iha rai maran no tasi laran.
Enkuantu iha área edukasaun oinsa atu hametin liutan kooperasaun hodi haruka timoroan ba eskola iha Brunei Darussalam iha área oioin.
Alende ne’e, parte rua mós ko’alia kona-ba oinsa hametin mós kooperasaun iha área saúde tanba importante ba nasaun rua atu servisu hamutuk.
Rekorda fali katak, antes ne’e Brunei prontu simu timoroan hamutuk 20.000 ba servisu iha Brunei iha área, fabrika, ospitalidade, agrikultura no seluk tan.
Iha tinan kotuk Prezidente Repúblika José Ramos Horta vizita Brunei, konsege hasoru malu ho Sultan Hassanal Bolkiah Ibni Omar Ali Saifudden III promete hanetin relasaun entre nasaun rua no prontu apoiu Timor-Leste nia dezenvolvimentu.
Jornalista: Hortencio Sanchez
Editór : Florencio Miranda Ximenes
