iklan

EKONOMIA, HEADLINE

Governu-Parseiru hala’o diálogu públiku kona-ba polítika no matadalan agrikultura karbonu

Governu-Parseiru hala’o diálogu públiku kona-ba polítika no matadalan agrikultura karbonu

Ilustrasaun

DILI, 20 fevereiru 2024 (TATOLI)—Ministériu Turizmu no Ambiente liu husi Autoridade Nasionál Designada kombate Alterasaun Klimátika (ANDKAK) hamutuk ho parseiru no instituisaun relevante sira hala’o diálogu públiku ida atu dezenvolve liután kuadru legál no orientasaun ba implementasaun Agrikultura Karbonu iha Timor-Leste.

 

Prezidente ANDKAK,Pedro Godinho da Costa, dehan, diálogu ida ne’e  importante  tebes entre Governu, instituisaun relevante sira, no parseiru sira atu dezenvolve esbosu ida-ne’ebé kontribui ba atividade risku mudansa klimátika nian.

 

“Atu asegura katak Timor-Leste bele komersializa emisaun sira iha merkadu internasionál, ita tenke fornese ita-nia polítika, enkuadramentu legál, lei no sistema,” Pedro Godinho da Costa   informa ba jornalista sira iha JL Vila, Aimutin, ohin.

 

Prezidente ne’e hatutan, ohin hahú ona polítika merkadu karbonu no matadalan sira ne’ebé hetan apoiu husi Uniaun Europeia no Parseiru Internasionál sira hanesan seguransa ekonómika ba dezenvolvimentu Projetu.

 

“Ohin, ami introdús esbosu ida-ne’e ba públiku hodi diskute kona-ba dezenvolvimentu polítika di’ak liu atu hadi’a di’ak liután hodi sai hanesan orientasaun. Matadalan ne’e sei orienta ita atu implementa atividade sira hanesan jestaun fo’er no instalasaun painél solar, kuda ai-hun, kuda mango no indústria sira seluk hamenus emisaun,” nia informa.

 

Iha fatin hanesan, Sekretáriu Estadu Floresta, Fernandino Viera, hateten, Sekretáriu Estadu Floresta hamutuk ho ekipa parseiru dezenvolvimentu sira diskute kona-ba dezenvolvimentu polítika agrikultura karbonu no fó orientasaun atu implementa agrikultura karbonu iha TL.

 

“Ha’u hanoin ohin, ami iha instituisaun relevante no parseiru dezenvolvimentu sira halibur hamutuk hodi kria polítika, enkuadramentu no orientasaun ba agrikultura karbonu. Ha’u kontinua fó-hanoin ba instituisaun no parseiru dezenvolvimentu sira atu kria esbosu lei sira ne’ebé reflete kondisaun reál komunidade rurál sira nian,” nia informa.

 

Governante ne’e hatutan, esbosu lei sira-ne’e tenke fó benefísiu ba komunidade rurál sira tanba Governu iha responsabilidade atu salva komunidade rurál sira husi ki’ak.

 

Nune’e mós Xefe Portefólio Seguransa Ekonómika, Pedro Carvalho, informa, Uniaun Europeia dezenvolve hela polítika no orientasaun agrikultura karbonu iha TL.

 

“Ita dezenvolve ona mekanizmu sira atu apoia komunidade, oinsá sira bele halo navigasaun ba ideia agrikultura karbonu hodi fa’an emisaun iha merkadu hodi hetan rendimentu. Entaun, ami foka liu ba dezenvolvimentu rejistu, impaktu agrikultura karbonu hodi hetan benefísiu ba komunidade sira hanesan impaktu ambiente no hasa’e ambiente ne’ebé saudável no mós fornese finansiamentu ba moris, komunidade nian,” nia relata.

 

Projetu Jestaun Ambiente Dezenvolvimentu Rurál no Mudansa Klimátika, husi Uniaun Europeia (UE) Severin Mellac, hateten, parseiru halo ona kolaborasaun hamutuk ho ANDKAK dezenvolve ona esbosu agrikultura no orientasaun karbonu no sei introdús ba Sekretáriu Estadu Peskas nune’e bele introdús fila fali ba Konsellu Minsitru atu aprova nune’e bele implementa ona.

 

Jornalista: Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!