iklan

POLÍTIKA

Komisaun F rekomenda MS reabilita sentru saúde Comoro

Komisaun F rekomenda MS reabilita sentru saúde Comoro

Sentru Saúde Comoro. Imajen Tatoli/Egas Cristovão.

DILI, 20 fevereiru 2024 (TATOLI)—Komisaun F trata asuntu Saúde, Seguransa Sosiál no Igualidade Jéneru rekomenda ba Ministériu Saúde (MS) atu reabilita no expansaun ba infraestrutura sentru saúde Comoro atu bele akomoda pasiente ne’ebé asesu ba fasilidade saúde.

“Rekomendasaun ne’e ba Ministériu Saúde atu bele tau iha konsiderasaun,” refere relatóriu komisaun F ne’ebé Agência Tatoli asesu, tersa ne’e.

Rekomendasaun ne’e komisaun F hato’o bainhira hala’o Fiskalizasaun ba sentru saúde Comoro, ne’ebé lidera direta hosi Prezidente Komisaun, Deputada Maria ‘Gorumali’ Barreto, akompaña Deputadu membru komisaun sira hala’o iha loron 17 fulan-janeiru tinan ne’e, ho objetivu atu rekolla informasaun kona-ba implementasaun programa no atividade iha tinan 2023, espesifikamente relasiona ho rekursu umanu, aimoruk, konsumívél, reajente, ekipamentu saúde no seluk tan.

Relatóriu fiskalizasaun ne’e diskute no aprova iha reuniaun komisaun iha 31 janeiru 2024 no hetan aprovasaun ho votu a-favór neen (6), kontra 0 no abstensaun rua (2), no iha reuniaun plenária 19 fevereiru 2024 halo ona distribuisaun, ne’ebé hato’o mós relatóriu kópia ba Governu hodi bele tau atensaun.

Aleinde ne’e, komisaun mós rekomenda  pontu neen (6) mak hanesan;

  1. Reforsa serbisu koordenasaun no komunikasaun ho Institutu Nasionál Farmásia Produtu Medikamentu (INFPM) hodi disponibiliza item medikamentu no konsumível ne’ebé rejista stock out iha sentru saúde Comoro.
  2. Tau prioridade hodi reforsa númeru rekursu umanu no ekipamentu saúde atu redús frekuénsia transferénsia pasiente ba HNGV.
  3. Reforsa alokasaun orsamentu ba programa promosaun saúde hodi sensibiliza no hasa’e komunidade sira-nia kuiñesimentu iha área saúde.
  4. Reforsa disponibilidade suplementu ai-hán super-sereal ne’ebé mak durante ne’e sentru saúde Komoro la fornese ho regular ba pasiente ho má-nutrisaun.
  5. Reforsa disponibilidade ambulánsia no kareta multi-funsaun atu apoiu sentru saúde Komor onia prontidau máxima iha evakuasaun no transferénsia pasiente no atividade rutina ba promosaun saúde.
  6. Tau konsiderasaun ba revizaun montante petty cash ne’ebé trimestralmente simu husi serbisu saúde munisípiu Dili, tanba kustu operasionál la proposiona ho númeru pasiente ne’ebé sentru saúde Comoro akomoda.

Rekomendasaun ikus mak estabelese tabela presu ba sidadaun estranjeiru sira-ne’ebé la’ós rezidente iha Timor-Leste maibé benefísia atendimentu iha sentru saúde Comoro atu bele rekolla reseita ba Estadu.

Enkuantu, informasaun ne’ebé komisaun F rejista, dadus hosi fulan janeiru to’o dezembru tinan 2023 totál númeru vizitante 601.800,  totál pasiente ne’ebé konsulta 144.977, totál númeru vizitante iha emerjénsia 56.626, totál pasiente maternidade 2.532, totál pasiente ante natal care (ANC) 26.660, totál vizitante saúde oral 9.048, totál pasiente konsulta jerál 802 no transferénsia pasiente maternidade 911.

Tipu moras mak pasiente moras kulit 17.117, moras diareia 14.810, ipertensaun 7.110, pasiente hosi asidente 8.491, moras pneumonia 6.578, moras  sexually transmitted infections (STI’s) 3.152 no moras konjuntivitis 3.366, pasiente má-nutrisaun 4.518, dengue 621, tuberkuloze 473, HIV-SIDA 12.

Iha Sentru Saúde Comoro, iha profisionál saúde permanente hamutuk 140, kazuál na’in-sia (9) no voluntáriu na’in-10, ho kontratadu ne’ebé ramata kontratu iha loron 31 dezembru tinan 2023 hamutuk 85.

Profisionál saúde sira sufisiente atu halo atendimentu bainhira pasiente nia volume normál maibé la sufisiente bainhira identifika númeru pasiente ne’ebé boot.

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!