iklan

EKONOMIA, HEADLINE

Akadémiku no sosiedade sívil husu Governu implementa dekretu-lei númeru 37/2020 ho rigór

Akadémiku no sosiedade sívil husu Governu implementa dekretu-lei númeru 37/2020 ho rigór

Observasaun jornalista iha terrenu, loja balun uza plástiku hanesan embalajen ba produtu ne’ebé kompradór sosa, maski dekretu-lei vigora ona. Imajen TATOLI/Antónia Gusmão

DILI, 20 fevereiru 2024 (TATOLI)—Akadémiku sira no sosiedade sívil husu Governu implementa dekretu-lei númeru 37/202o kona-ba uzu plástiku iha Timor-Leste (TL), ho rigór.

“Tuir ha’u-nia hanoin Governu implementa  dekretu lei númeru 37/2020  ho rigor  kona-ba bandu uza plástiku iha ita-nia rain, tanba ha’u haree hanesan loja xineza no mós kioske sira kontinua uza plástiku bainhira ema sosa sasan sira entaun, plástiku sira ne’e  kontinua domina iha sidade Dili fó imapktu maka’as ba iha inundasaun bainhira udan monu rai,” Estudante Ana Ligena de Jesus Ximenes informa ba Tatoli iha UNTL, Caicoli, ohin.

Estudante Ana Ligena de Jesus Ximenes. Imajen Tatoli/Felicidade Ximenes

Estudante finalista Fakuldade Turizmu, Arte, Indústria Kriativa no Kulturál, Departamentu Komérsiu no Turizmu, UNTL ne’e esplika, plástiku fó impaktu ba meiu-ambiente tanba plástiku ne’e lixu naun-orgániku. Tanba ne’e, Governu tenke tau atensaun maka’as ba Loja no Kioske sira ne’ebé mak sei utiliza plástiku.

“Se bainhira plástiku nafatin domina ita-nia rain, sei fó impaktu ba iha inundasaun, no mós sei fó impaktu ba iha biodiversidade iha tasi-laran tanba bainhira la tau lixu ba iha nia fatin mak bee sei lori to’o ba iha iha tasi laran,” nia informa.

Estudante Universidade Nasionál Timor Lorosa’e (UNTL) ne’e afirma, Governu implementa ona Zero Plástiku iha Timor-Leste maibé sidadaun sira sei nafatin utiliza plástiku ho nune’e tuir nia sidadaun sira ne’e kontra lei ne’ebé Governu hatuur ba.

“Ita sira uza plástiku ne’e kontra lei. Maibé, ha’u haree ita-nia Governu la implementa lei ne’ebé mak sira hatuur ona. Tan ne’e, presiza Governu tau lei ida  ne’ebé  mak rigorozu liután atu nune’e ema hotu bele ta’uk, hodi tau lixu iha nia fatin no fó sansaun ba sira ne’ebé mak soe lixu arbiru no mós husu Governu atu fó sansaun ba iha loja sira ne’ebé  mak sei ua plástiku,” nia propoen.

Akadémika UNTL ne’e, esplika, bainhira Governu la fó sansaun ba ba loja sira ne’ebé mak sei uza plástiku tinan ba tinan Timor-Leste sei la rezolve lixu plástiku iha Dili laran tanba komunidade sira ne’ebé mak la iha konsiénsia sei naftin soe lixu arbiru.

Nune’e mós, Josefa da Luz da Costa, Estudante UNTL ida mós, maske Governu bandu ona labele uza plástiku maibé loja no kioske sira nafatin fa’an plástiku ida ne’e fó impaktu tebes ba ambiente Timor-Leste nian tanba plástiku hanesan fo’er ne’ebé labele mohu ka lakon bainhira ita sunu.

Josefa da Luz da Costa, Estudante UNTL. Imajen Tatoli/Felicidade Ximenes

Nia hatutan, loja no keoske sira fa’an plástiku ne’e bazeia ba nesesidade tanba husi fa’an hadi’a sira-nia ekonomia lorloron maibé Governu bandu ona tenke implementa ho sériu nune’e ema la bele importa plástiku mai iha TL.

“Sira fa’an plástiku tanba bazeia ba nesesidade ema ida idak tanba husi fa’an ne’e atu sustenta moris lorloron nian. Maibé, ita-sira kompradór mak iha konsiénsia  katak presiza tau nia fatin; labele soe arbiru nune’e labele hamosu ambiente ida ne’ebé la di’ak ba ita nia rain,” nia subliña.

Estudante finalista Fakuldade Turizmu, Arte, Indústria Kriativa no Kulturál, Departamentu Komérsiu no Turizmu ne’e dehan, bainhira Governu ho lei bandu atu sidadaun sira la uza plástiku tenke implementa ho rigór maibé la kontrola signifika plástiku sei nafatin domina iha TL.

“Lei ne’ebé Governu implementa ne’e la’ós ita povo kontra. Maibé, ha’u sente lei ne’ebé iha la vigór ga la vale, entaun presiza Governu tenke kontrola nune’e bele reduz, tanba ita-nia nasaun moris iha demokrasia ida nune’e fila fali ba ita ema nia konsiénsia uza plástiku iha ita-nia rain,” nia ko’alia.

Estudante ne’e husu ba Governu tenke haree kestaun plástiku ne’e tanba Timor-Leste ukun aan tinan 20-resin ona presiza ambiente ne’ebé moos no saudável.

Iha parte seluk, Organizasaun naun-Governamententál (ONG), Fundasaun Haburas, husu Governu atu toma atensaun ba negosiante sira ne’ebé sei uza plástiku maske Governu bandu ona.

“Nu’udar Estadu ne’ebé mak regula buat hotu iha ita-nia rain ha’u hanoin Dekretu Leinúmeru 37/2020 kona-ba bandu atu uza plástiku ida ne’e ita tenke kumpri no implementa iha nasaun. Maibé, realidade katak negosiante sira sei kontinua uza iha merkadu sira entaun Governu nia papél mak tenke tau atensaun másimu ba asuntu sira ne’e,” Diretór-ezekutivu Fundasaun Haburas, Pederito Veira hateten.

Ezekutivu ne’e akresenta, tuir observasaun Fundasuan Haburas katak dekretu lei sai ona katak labele uza plástiku iha merkadu sira, maibé realidade plástiku sei naklekar iha fatin-fatin depois negosiante sira mós sei fa’an plástiku nune’e lixu sira naklekar iha fatin sira maioria plástiku mak domina.

“Ha’u hanoin Governu seidauk iha seriedade ba dekretu-lei ne’ebé mak ita fó sai ona, maibé ita presiza maneira ida oinsá bele fó hanoin ba populasaun, la’ós impelmenta tiha lei ita rai fali iha gaveta laran la halo sosializasaun ba ema hotu tanba bainhira iha lei, regulamentu, maibé la iha sosializasaun, monitorizasaun, ema la hatene, entaun uza nafatin,” nia konsidera.

Sosiedade sívil ne’e husu Governu atu  sosializa ba lei sira ne’e no tenke tuun ba aldeia, bairru sira nune’e ema hotu hatene kona-ba labele uza plástiku sira ne’e.

“Ita presiza sosializasaun monitorizasuan no nia implementasaun  ba lei ne’e to’o iha ne’ebé? Presiza ba iha fatin hotu liliu ba iha bairru, suku, atu nune’e ema hatene katak antes ne Governu bandu ona ita la bele uza plástiku. Entaun tuir ami-nia haree katak Governu tenke iha dever atu haree ba asuntu sira ne’e.  Se de’it mak viola regulamentu ne’ebé Governu fó mak sei fó sansaun. Entaun, ho ida ne’e mak sira ta’uk atu labele fa’an. Maibé, buat sira ne’e to’o agora ita seidauk implemeta,” nia relata.

Diretór-ezekutivu Fundasaun Haburas, Pederito Vieira, salienta, Estadu TL tenke tau matan ba asuntu plástiku sira ne’ebé tama ilegál mai tanba ida ne’e fó impkatu boot maibé hanesan sosiedade sívil hanoin katak ida ne’e la fasil atu buka tanba rekursu ne’ebé mak iha área fronteira menus atu kontrola ida ne’e.

“Ita tenke tau matan ba plástiku sira ne’ebé mak tama mai husi rai-li’ur, tanba ida ne’e fó impaktu boot ba ita-nia Estadu, entaun  ida ne’e ha’u hanoin la fasil ita  atu halo, tanba ita-nia polísia sira iha fronteira  ladun sufisiente maibé  koko  atu halo buat ruma hanesan ema ilegál hatama plástiku ita haree tenke kaer  maibé ha’u hanoin ida ne’e Estadu presiza halo evaluasaun  ba asuntu ida ne’e,” nia esplika.

Sei halo sosializasaun

Nune’e, Diretór Nasionál ba Kontrolu Poluisaun iha Ministériu Turizmu no Ambiente, Nelson Madeira, rekoñese nafatin katak plástiku sei domina iha loja no kioske sira  tanba ne’e Governu  presiza halo sosializasaun másimu ba iha merkadu sira.

“Ita halo sosializasuan iha tinan ida ne’e bainhira   programa Governu nian la’o ona. Maibé, agora daudaun ami-nia osan seidauk iha signifika sei dudu ba dudu mai. Entaun, ida ne’e mak ami seidauk tuun ba terrenu. Bainhira ami sei tuun ba hotu Munisípiu sira, maibé espera katak tinan ida ne’e ami sei halo sosializasaun,” Nelson Madeira garante.

Nia adianta, husi plástiku sira ne’e fó impaktu tebes ba ambiente liliu lixu ne’ebé nakonu, maibé ida ne’e konsiénsia ema nian atu soe fo’er iha nia fatin, tanba Governu kria ona fatin lixu, maibé ema mak soe fo’er arbiru nafatin.

“Durante ne’e ami halo ona sosilizasaun iha territóriu tomak, espera  katak ami sei kontinua iha tinan ida ne’e  atu nune’e ema hotu hatene katak nia benefísiu  ne’e  saida no nia implaktu negativu  husi plástiku ne’e rasik ne’e saida tanba iha supermerkadu sira ami nafatin halo inspesaun  nune’e ami sempre haree katak plástiku sira la iha ona, maibé ita haree kioske no loja mak plástiku sei iha, tanba iha preokupasaun ne’ebé mak  iha katak plástiku fasil atu hetan, maibé saku ne’e ita  presiza hola tan, maibé sira la hatene impaktu boot husi plástiku  ne’e oinsá,” nia relata.

Diretór Nelson Madeira promete, bainhira hetan ema halo produsaun ba plástiku iha Timor-Leste, sei fó sansaun tuir lei ne’ebé mak iha husi valór vária entre 5.000 mil to’o 10 mil dolár.

“Bainhira ita halo sensibilizasaun  mak hetan ema fa’an plástiku iha loja no kioske sira ita la fó sansaun ita fó informasaun de’it nune’e labele uza. Bainhira ita fó sansaun mak ita hetan ema halo produzasaun ba plástiku sira ne’e,” nia salienta.

Programa Governu konstituisionál da-sia katak, tuir Konstituisaun Repúblika, ema hotu-hotu iha direitu ba ambiente vida umana, ne’ebé sadiu no ekolojikamente ekilibradu, no mós iha devér atu proteje no hadi’a ba jerasaun vindoura (ka aban-bainrua nian). Estadu rekoñese katak presiza prezerva no fó valór ba rekursu naturál. Estadu tenke promove asaun ba defeza do meiu-ambiente no salvaguarda dezenvolvimentu sustentável ba ekonomia.

Povu Timór iha ligasaun ne’ebé forte ho meiu-ambiente, ne’ebé hadulas nia, la’ós de’it tanba kestaun sira relasiona ho sobrevivénsia (ka tahan moris) maibé mós tanba razaun kulturál ho antropolójika. Maibé, aleinde kauza naturál sira, hanesan udan, esplorasaun ne’ebé dezekilibrada, ka mezmu destruisaun meiu-ambiente, ne’ebé, durante ne’e, provoka erozaun beibeik ba rai, inklui hahalok hanesan taa demais ai no sobu ai-laran boot sira, sunu rai no la iha planeamentu ho monitorizasaun ba atividade agríkola no konstrusaun infraestrutura.

Erozaun (ka rai monu) no dezlizamentus (ka rai halai), mak kauza degradasaun ba rai no estraga mós kaptasaun bee, hodi hamenus kuantidade no kualidade bee husi rai-okos no ameasa vida selvajen ho rekursu alimentár sira. Husi sikun seluk, ábitu (ka lisan) sosioekonómiku hanesan uza ai-maran hodi te’in no poluisaun (ka hafo’er atmosfera) tanba emisaun (ka su’ar) husi karreta ho motorizada no sunu ai-laran, buat sira ne’e hotu mak kontribui hodi aumenta doensa respiratoria sira (ka moras dada-iis nian).

Nune’e mós, alterasaun klimátika ne’ebé halo nível tasi sa’e aas no hamosu kondisaun meteorolójika sira ne’ebé aat tebetebes, hodi provoka inundasaun, inseguransa alimentar, alterasaun iha kompozisaun kímika ho temperatura tasi ne’ebé afeta resife korál (ka fatuk ahu-ruin) iha Tasi, buat sira ne’e hotu mak sai hanesan dezafiu ambientál sériu ida, ne’ebé Timor-Leste tenke fó resposta no kria mekanizmus de prevensaun.

Bele dehan katak ne’e hanesan dezafiu ida tan ba Timor-Leste, haree ba ninia faze embrionária (foin hahú) iha dezenvolvimentu, ne’ebé presiza tebes duni kreximentu indústria suporte (ka hodi fó apoiu) ba kreximentu ekonómiku. Maibé, bele subliña mós katak kontribuisaun Timor-Leste ba problema alterasaun klimátika, ne’e ki’ik tebes duni, tanba Timor-Leste país ida ne’ebé ladun hasai ‘dióksidu karbonu’, la hanesan ho nasaun emerjente no dezenvolvida sira.

Importante mos atu refere iha ne’e katak defeza ho konservasaun meiu ambiente, inklui promosaun ba biodiversidade, sai hanesan kontributu importante ba dezenvolvimentu indústria ida ho potensiál maka’as, katak, kreximentu setór turístiku.

Tanba ne’e, Governu sei kontinua ho objetivu prioritáriu ba área ambientál, hanesan tuirmai:

  • Haree di’ak fali no reforsa kuadru institusionál no legál ambiente nian, kona-ba uzu sustentável rekursu naturál sira, inklui planeamentu ne’ebé di’ak liu, ho monitorizasaun iha setór transversál ba dezenvolvimentu país nian, hodi prevene deteriorasaun (ka degradasaun) ambientál no hadi’a jestaun ambientál país ne’e nian;
  • Promove kampaña sensibilizasaun nian kona-ba kestaun ambientál sira no dezenvolve konteúdu ho asaun sira, ne’ebé permite edukasaun ambientál ida ne’ebé jeneralizada, ba labarik sira, joven, adultu ho komunidade sira, liuliu kona-ba prezervasaun ambiente;
  • Hadi’a koordenasaun intersetoriál, atu nune’e bele inklui preokupasaun ambientál iha programa dezenvolvimentu País, inklui área agrikultura no peska, dezenvolvimentu de infraestrutura, turizmu ho esplorasaun rekursu enerjétiku sira;
  • Kapasita no hadi’a instituisaun no organizmu sira ne’ebé responsável ba jestaun, monitorizasaun no fiskalizasaun kona-ba kestaun ambientál sira, ho prioridade ba lokalidade (ka fatin) no área intervensaun sira, ne’ebé ho risku boot liu ba degradasaun ambientál;
  • Reforsa parseria nasionál no internasionál ba jestaun ambientál ne’ebé di’ak liu.

Tanba ne’e, Governu propoen atu dezenvolve asaun sira, hanesan tuirmai:

  • Implementa rejime jurídiku kona-ba jestaun, protesaun ho konservasaun ambientál, inklui estratéjia ho planu asaun ne’ebé aprova tiha ona, inklui lejizlasaun kona-ba biodiversidade Nasionál, protesaun animál selvajen sira ka fuik, no seluktan;
  • Kontinua akompaña no subskreve akordu, programa no mekanizmu internasionál, ne’ebé relasiona ho jestaun no konservasaun ambiente no alterasaun klimátika, inklui nia tradusaun iha lejizlasaun Nasionál no implementasaun medida no norma, ne’ebé adota tiha ona (diminuisaun emisaun HCFC, Konvensaun Viena kona-ba ozono, Konvensaun internasionál UNFCCC, UNCCD, UNCBD, Akordu Paris, no sst);
  • Introdús (ka hatama) programa foun ho kampaña kona-ba redusaun sunu rai no sunu ai-laran, durante époka (ka tempu) rai-maran, inklui substitui (ka troka) neineik ábitu uza ai-maran hanesan fonte enerjia;
  • Dezenvolve programa kona-ba rekolla no tratamentu rezíduus sólidus no líkidus (ka maran no bén) iha país tomak, ho prioridade ba área Díli;
  • Kontinua asegura implementasaun do Prémiu ba Suku Saudável no dezenvolve Prémiu “Habali Ambiente” ba entidade komersiál, industriál no privadus, atu promove prinsípiu poluidór-pagadór, konservasaun ba biodiversidade, redusaun ba emisaun karbonu ka medida ne’ebé ho objetivu hadi’a ambiente;
  • Dezenvolve no implementa regulamentu kona-ba kontrolu poluisaun ar, ruídu (ka tarutu) no rai, ho mós poluisaun atmosférika (ka lalehan) tanba gazes (ka su’ar fó’er) ne’ebé sai husi veíkulu;
  • Kontinua investe iha kapasidade rekursu umanu iha área kontrolu ambientál, inklui uzu de metodolojias foun ho testes ambientais;
  • Estabelese laboratóriu ambientál ida, hodi halo testes ambientais ho ninia inspesaun, monotorizasaun no fiskalizasaun rasik;
  • Produz estatístikas ambientais kona-ba Timor-Leste no asegura nia divulgasaun, tantu ba Ezekutivu hodi bele foti desizaun, hanesan mós ba koñesimentu públiku ein-jerál;
  • Implementa Estratéjia Nasionál ba mitigasaun ka redusaun lixu (ka fó’er) husi tasi;
  • Implementa Estratéjia ho Planu de Asaun kona-ba Biodiversidade Nasionál;
  • Servisu hamutuk ho CPLP no ASEAN, iha kompromisu atu dezenvolve “Estratéjia kona-ba Oseanus”, buat ne’ebé transversál ba área sira hanesan ambiente no ekonomia;
  • Kontinua investe iha rede boot ida ba parke nasionál, terrestre no mariñu, ne’ebé bele proteje amostra reprezentativa biodiversidade país nian;
  • Insentiva koñesimentu ne’ebé boot liu, kona-ba protesaun ambientál no prinsípiu ambientál, iha kurríkulu iha ensinu formál, no mós promove kampaña ho asaun liuhusi ensinu naun-formál;
  • Dezenvolve Sistema Nasionál kona-ba Área Protejida no Park Nasionál no Konservasaun Biodiversidade;
  • Dezenvolve koordenasaun entre entidade governamentál ho responsabilidade ba setór ambientál no entidade governamentál ne’ebé ho responsabilidade kona-ba setór turizmu, hodi kria programas kona-ba protesaun ekosistemas espesífikus, hanesan tartarugas (ka lenuk), no korais (ka ahu-ruin), etc.;
  • Implementa “Polítika Zero Plástiku” iha territóriu tomak no dezenvolve programa ne’ebé efikazes, hodi kombate plástiku, hodi halo nia substituisaun bainhira bele, inklui sensibilizasaun kona-ba perigu uza plástiku, liuliu tanba degradasaun (ka estraga) tasi Timor, no mós oinsá dezenvolve indústria resiklajen ba plástiku;
  • Kontinua halo identifikasaun no levantamentu ba dadus kona-ba rikeza da biodiversidade, inklui mapeamentu do ekosistema hosi biodiversidade oin-oin iha Rai leten, Tasi Laran, fatin bokon sira no ekosistema seluk ne’ebé iha risku boot;
  • Promove no reforsa prátika kulturál ne’ebé di’ak kona-ba protesaun ambientál, halo konservasaun ba natureza, protesaun ba fatin patrimóniu ho biodiversidade ne’ebé relevante;
  • Promove setór ambientál iha Timor-Leste tuir Polítika ba Ekonomia Azul Timor-Leste nian, inklui promosaun kampaña sira kona-ba kestaun ambientál espesífika sira ne’ebé afeta tasi, tanba tasi hetan hela presaun antrópica (presaun husi atividade ema nian) makaas, no ninia konsekuénsia, liuliu konsekuénsia sira ne’ebé relasiona ho poluisaun, alterasaun klimátika no peska ne’ebé demais ka agresiva.

Nune’e, iha tinan 2024, Orsamentu Jerál Estadu (OJE) ba Ministériu Turizmu no Ambiente hamutuk $4,723,375.00.

Jornalista : Felicidade Ximenes

Editór: Rafael Ximenes de A. Belo

iklan
iklan

Leave a Reply

iklan
error: Content is protected !!