DILI, 21 fevereiru 2024 (TATOLI) – Grupu 15 hetan apoiu fini animál hanesan fahi, karau no bibi pár 30 husi Diresaun Nasionál Pekuária, Ministériu Agrikultura Pekuária, Peska no Floresta (MAPPF), ne’ebé sosa ho osan rihun $48.
Diretór Nasionál Pekuária, Augostu Barros, hatete objetivu Governu nian hodi distribui balada sira ba grupu benefisiáriu sira iha munisípiu lima atu haki’ak hodi fa’an no hetan lukru, nune’e bele ajuda nesesidade família nian.
“Ita fó ona fahi, karau no bibi ba sira haki’ak, maibé sira tenke haki’ak ho kuidadu bainhira to’o tempu tenke fó fali nia oan sira ne’e ida-idak mai Governu atu ita bele kontinua distribui fali ba grupu sira seluk”, diretór Augostu Barros hatete iha Comoro, ohin.
Dirijente ne’e salienta katak fini animál ne’ebé diresaun sosa ne’e kompostu husi fahi rasa pár 15, karau vaka 10 no bibi lima. Durasaun tempu ba fahi rasa atu halo produsaun ne’e pelu menus tinan rua-resin, karau vaka tinan lima no bibi tinan rua.
Tanba ne’e, Diresaun Pakuária kontinua husu ba grupu 15 ne’ebé mai husi Dili iha grupu rua, Manatuto tolu, Liquiçá tolu, Manufahi tolu no Covalima haat ne’e tenke haki’ak animál sira ho di’ak, nune’e bele fó rezultadu ne’ebé di’ak, tanba dala barak grupu sira hetan tiha apoiu, maibé balun laiha esperiénsia atu haki’ak animál, ikus mai balun mate no balun la fó produsaun.
“Bainhira animál sira ne’e hatudu ona ninia rezultadu, sira tenke aprezenta relatóriu kona-ba progresu husi prosesu haki’ak animál sira ne’e atubele sai mós evidénsia ida ba futuru kuandu sira presiza atu hetan tan apoiu bele submete proposta mai diresaun kona-ba saida maka sira presiza bele hetan atendimentu ho lalais”, dehan.
Xefe grupu Buka Moris Foun husi Manatuto, Abel dos Santos Gusmão, hatete nia simu fahi rasa pár ida no daudaun haki’ak ona ba fulan rua. Fahi ne’ebé haki’ak ne’e iha kondisaun ne’ebé di’ak tanba luhan ne’ebé tau fahi sira ne’e nahe ho simentu, loroloron sempre fase nune’e labele dois no bele hadook animál sira ne’e husi moras.
“Ami kontinua asume reponsabilidade, ami promete sei kuidadu animál sira ne’e atubele hetan dezenvolvimentu di’ak, nune’e sira ne’e bele fó oan barak”, nia espera.
Notísia relevante: Benefisiáriu 300-resin hetan fundu $49.308 hodi haki’ak ikan
Jornalista: Tomé Amado
Editora: Maria Auxiliadora
