DILI, 21 fevereiru 2024 (TATOLI)—Iha fulan janeiru 2024, Sentru Saúde Internamentu Vera Cruz, munisípiu Dili, rejista labarik hamutuk 1.491. Husi ne’e, labarik ne’ebé ho má nutrisaun hamutuk 225.
Dadus Jerál husi Sentru Saúde Internamentu Vera Kruz hatudu, hahú iha fulan janeiru tinan 2024, rejista labarik hamutuk 1.491, husi númeru ne’e, profisionál saúde sira deteta labarik mai ho má nutrisaun hamutuk 225, kompostu husi má nutrisaun moderadu 149, no má nutrisaun grave 76.
“Atu deteta labarik sira mai ho má nutrisaun tenke ba iha indikadór ida sukat liman-kabun leten, no sukat ba labarik idade fulan neen to’o tinan lima; ida ne’e mak ita foin hatene labarik sira hetan má nutrisaun. Entaun, ita rejista labarik ne’ebé maka mai ho má nutrisaun moderadu, depois iha mós labarik ne’ebé maka afeta ho má nutrisaun grave, ne’e bazeia ba todan ho idade,” Responsavel Nutrisaun iha Sentru Saúde Internamentu Vera Cruz, António da Cruz, informa, ba jornalista sira iha nia kna’ar fatin Vera Kruz, ohin.
Responsavel ne’e afirma, liuhusi sukat liman kabun ne’e deteta labarik ne’ebé mak ho má nutrisaun moderadu ne’e iha 76, no labarik ne’ebé mai ho má nutrisaun grave hamutuk na’in lima, kompostu husi iha feto na’in haat no mane ida.
“Ami nafatin fó akonselamentu ba inan-aman sira, nune’e ba oan sira ne’ebé maka sofre ona má nutrisaun sira tenke kuidadu oinsá bele prepara hahan no fó mós aihan ne’ebé nutritivu ba oan sira”, nia dehan.
Nia esplika, labarik hetan má nutrisaun barak ne’e, tanba kauza husi rai-rahun, depois konsumu ai-han ne’ebé mak la’ós ho nutritivu, depois inan sira ladun fó atensaun ba oan sira, tanba servisu barak, entaun labarik sira mós han latuir oras, depois konsumu ai-han ne’ebé mak la fó nutrisaun di’ak ba sira-nia isin.
“Labarik ne’ebé mak atu hetan ai-han suplementu planpinat ne’e bazeia ba sukat labarik nia liman-kabun leten, ne’e hahú husi idade fulan neen to’o tinan lima. Bainhira sukat mak indika katak hetan má nutrisaun moderadu hetan ai-han husi sentru saúde, mak hanesan hahan planpinat ne’e ba ita-nia oan sira, ” nia esplika.
Nia dehan, kona-ba aihan planpinat ne’e iha Sentru Saúde Vera Cruz, sufisiente hela, tanba iha armajen Institutu Nasionál Farmasia Produtu Mediku ne’e, estoke sei barak hela.
Iha fatin hanesan, Família pasiente, Marina da Silva, informa, maske nia oan hetan má nutrisaun, maibé iha sentru refere nafatin fó atendimentu no fó mós ai-han suplementu hanesan planpinat ho f100.
“Bainhira ami-nia oan lori mai hetan má nutrisaun ne’e ami simu ai-han sira ne’e hodi fó ba ami-nia oan sira. Ita tenke fó ai-han tuir orientasaun husi pesoál saúde sira”, Marina da Silva afirma.
Antes ne’e, Diretór Ezekutivu Institutu Nasionál Farmasia no Produtu Médiku (INFPM), Brigidio de Deus, informa, kona-ba ai-han ba má nutrisaun nian iha armajen sei sufisiente atu distribui ba fasilidade saúde sira.
“Tanba iha tinan kotuk, ita hatama ai-han ba má nutrisaun ne’e barak, ne’ebé balun halo ona distribuisaun ba iha fasilidade saúde sira, no balun sei iha armajen hela”, nia konklui.
Jornalista : Felicidade Ximenes
Editór: Rafael Ximenes de A. Belo
