Komisaun D sei fó prioridade diskute proposta-Lei Abitasaun-Dezenvolvimentu Rurál
DILI, 21 fevereiru 2024 (TATOLI)—Komisaun D trata asuntu Ekonómia no Dezenvolvimentu iha Parlamentu Nasionál (PN), kuarta ne’e, hala’o audiénsia públika ho Vise-Primeiru-Ministru no Ministru Dezenvolvimentu Rurál no Abitasaun, Mariano Assanami Sabino, iha Parlamentu Nasionál.
Prezidente komisaun D, Deputadu Ricardo Baptista, hateten komisaun halo audiénsia hodi bolu Ministru ho ninia ekipa mai ho objetivu husu sira lejislasaun saida mak sira atu prepara iha tinan ida-ne’e, atu nune’e komisaun D halo kalendáriu ba ninia serbisu durante tinan ida.
“Ohin, iha lejislasaun rua mak sira atu hato’o mai mak lejislasaun ba Abitasaun no Lei Dezenvolvimentu Rurál. Komisaun konsidera abitasaun mós problema boot akontese hanesan inundasaun iha terrotóriu nasionál, nune’e lei ne’e pertinente tebes atu bele diskute no bele sai lei ida hodi regula,” Prezidente komisaun D ne’e hateten ba jornalista sira hafoin ramata audiénsia iha sala konferénsia PN.
Bainhira Governu aprezenta inisiativa lei ne’e mai, PN nu’udar órgaun lejisladór mak komisaun sei tau prioridade hodi diskute no aprova.
Vise-Primeiru-Ministru no Ministru Dezenvolvimentu Rurál no Abitasaun, Mariano Assanami Sabino, hateten audiénsia ne’e ko’alia liga ba ministériu nia serbisu liliu ba dezenvolvimentu rurál no abitasaun komunitária.
Nune’e, nia parte mai aprezenta programa sira-ne’ebé aprova ona no hosi komisaun D hakarak hatene prosesu la’o oinsá ho esplika kle’an liután dezenvolvimentu fíziku ne’ebé hala’o ona.
“Dezenvolvimentu rural ne’e ministériu ida-ne’ebé mak foun, depois tinan 20 mak ita sente presiza duni. Katak, iha atividade oioin ne’ebé iha ona iha saúde rural, edukasaun rurál, agrikultura rurál no iha buat oioin, entaun ministériu mosu hodi oinsá mak organiza, armoniza nune’e sai programa integradu ho nia objetivu prinsipál mak povu tenke moris di’ak,” nia hateten.
Abitasaun, tuir nia, durante ne’e iha ona no fó atensaun maibé seidauk iha ministériu abitasaun, tanba ne’e iha ministériu ne’e atu iha planu estratéjiku dezenvolvimentu nasionál, presiza iha ordenamentu territoriál ordena di’ak hotu, tenke halo uma dignu ba povu ne’ebé agora daudaun atu halo iha Natarbora, Manufahi, Tunubibi-Bobonaro
“Ita mós iha uma sosiál, ita iha mós uma subsídiu ne’ebé mak ba funsionáriu ne’ebé sei halo planu didi’ak. Ita mós iha uma komérsiu no hirak ne’e hotu tenke aruma polítika abitasaun no iha lei abitasaun ne’ebé mak iha tempu badak ami sei aprezenta ba Parlamentu Nasionál,” nia dehan.
Jornalista : Nelson de Sousa
Editór : Cancio Ximenes
