DILI, 21 fevereiru 2024 (TATOLI) – Prezidente Repúblika, José Ramos Horta, tersa ne’e, organiza resesaun diplomátika anuál hodi halibur membru korpu diplomátiku, ofisiál Governu no konvidadu hosi internasionál atu hametin relasaun amizade no kooperasaun entre nasaun Timor-Leste no nasaun internasional.
Iha diskursu, Prezidente Ramos Horta hato’o bemvindu ba diplomata sira no agradese ba sira-nia amizade no apoiu ba Timor-Leste iha setór oinoin ba dezenvolvimentu nasaun.
“Hanesan onra ida hosi ami ba parseria ne’ebé ita harii ona no agradese ba asisténsia ne’ebé ami simu ona durante tinan hirak-ne’e,” agradese Xefe Estadu.
Tuir PR Horta katak resesaun ne’e fó oportunidade ida atu hasoru malu fali, hametin relasaun amizade no kooperasaun ne’ebé importante bainhira nasaun ne’e kontinua iha kresimentu.
Resesaun Anuál ne’ebé hala’o kada tinan iha Palásiu Prezidensiál hodi fó oportunidade ida ba komunidade diplomátika atu envolve diretamente ho lider timoroan sira iha situasaun sosiál ida.
Resepsaun mós selebra troka kulturál liuhusi espozisaun ne’ebé hatudu Timor nia aspetu kultura, liuliu husi espozisaun etnográfika no artístika ne’ebé hatudu tradisaun antigu, kostumu, abitu sira no prátika Timor nian.
Espozisaun ne’e hakarak kadi interese hosi vizitante sira, hodi enkoraja sira atu kontinua esplora rikueza kultura Timor nian.
Iha kalan ne’e ramata ho hi’it kalís ba amizade no kooperasaun entre Timor-Leste no nasaun parseiru sira. Nune’e Prezidente hatudu optimizmu ba ligasaun ne’ebé forte liután entre Timor-Leste no komunidade Internasionál iha tinan hirak oin mai.
Jornalista: Hortencio Sanchez
Editór : Florencio Miranda Ximenes
