iklan

NASIONÁL, HEADLINE, KAPITÁL

SEATOU sobu barraka negosiante iha Ai-mutin no muda bá Merkadu Manleuana

SEATOU sobu barraka negosiante iha Ai-mutin no muda bá Merkadu Manleuana

Ekipa servisu tékniku mobiliza ekipamentu pezadu hosi sobu barraka negosiante sira iha Ai-mutin inklui normaliza valeta, kuarta (21/02/2024). Imajen Tatoli/ António Daciparu

DILI, 21 fevereiru 2024 (TATOLI)—Governu liuhosi Sekretaria Estadu Asuntu Toponímia Organizasaun Urbana (SEATOU) no ekipa servisu tékniku, kuarta ne’e, hahú sobu barraka ne’ebé negosiante sira uza fa’an roupa segunda mão (obralan) iha Ai-mutin.

Ekipa ne’ebé hamutuk ho SEATOU mak hanesan ekipa téknika hosi Jestaun Merkadu Munisípiu Dili, Ministériu Obra Públika (MOP), ne’ebé hetan seguransa hosi Polísia Nasionál Timor-Leste (PNTL).

Sekretáriu Estadu Asuntu Toponímia Organizasaun Urbana, Germano Santa Brites Dias, hateten, atuasaun ne’e bazeia ba despaisu ne’ebé fó sai iha loron hirak liubá, katak sei hasai instalasaun ne’ebé perturba espasu públiku.

“Ohin ita muda sai vendedór sira ne’ebé fa’an obralan iha Ai-mutin bá Merkadu Manleuna hodi hamamuk fatin ne’e, nune’e públiku bele asesu dalan ne’e, maski ita-nia vendedór sira balun halo protesta maibé ita hakarak dezenvolve sidade Dili ne’e sai di’ak, tanba ne’e komunidade tenke koopera ho Governu,” Governante ne’e dehan iha Ai-mutin, kuarta ne’e.

Notísia relevante : Hahú 19 fevereiru, servisu tékniku sobu instalasaun perturba espasu públiku

Aleinde ne’e, ekipa responsável halo mós atividade hanesan hahú hosi Bairru Formosa, tanba ne’e husu komunidade hamamuk kalsada (trotoar) ne’ebé sira okupa iha parte Cruz Vermelha de Timor-Leste (CVTL) nia oin to’o semáforu atu sa’e ba Estádiu Munisipál Dili inklui mákina pezadu sei sobu instalasaun iha pedestre ne’ebé komunidade konstrui instalasaun ba fa’an sasán inklui ai-hali sira ne’ebé ema tara labarik nia kan iha Dili laran sei tesi sai hotu.

Sekretáriu Estadu hateten, la’ós ohin mak foin fó avizu, maibé desde iha setembru 2023 to’o fevereiru 2024, nune’e iha sábadu no domingu ekipa jestaun merkadu sempre fó avizu ba komunidade atu hamamuk maibé nafatin la koopera.

“Entaun ohin ekipa tenke tun hasai sira. Atu vendedór koopera ka la koopera fatin ne’e tenke sobu tanba ita hakarak dezenvolvimentu tenke la’o, ita hakarak kondisaun sidade ne’e tenke di’ak no organizadu,” nia akresenta.

Governante ne’e konsidera, Merkadu Manleuana iha fatin sufisiente, tanba ne’e negosiante hosi Ai-mutin tama mak Governu fó fatin tanba nu’udar rai Estadu ne’ebé Jestaun Merkadu mak jere.

“Laiha Governu no Estadu mak atu halo planu ne’ebé fó terus ba nia povu, tanba ne’e husu ita hotu koopera malu nune’e ita dezenvolve ita-nia rai ne’e ho di’ak. Ita tenke muda sira sai tanba Governu hakarak atu jere sidade ne’e tenke la’o ho di’ak,” nia tenik.

Ohin mákina pezadu hahú sobu ona no sei hamoos valeta kuak, nune’e parte MOP sei haree no hadi’a estrada sira.

Muda negosiante hamutuk 258

Iha fatin hanesan, Diretór Jestaun Merkadu Turizmu Munisípiu Dili, Artur Henriques, relata, vendedór obralan Ai-mutin ne’ebé ohin sira muda sai bá merkadu Manleuana hamutuk 258.

“Hosi sira ne’e, na’in-145 mak naran Jestaun Merkadu rejistu ona maibé sira seluk agora mak foin ita rejistu atu sira ba hotu Merkadu Manleuana tanba iha ne’ebá iha espasu,” nia tenik.

Diretór nota vendedór sira preokupa ho fatin maibé iha Merkadu Manleuana nia kotuk sei iha rai mamuk barak, ne’ebé ekipa responsável sei jere fatin sira hodi fa’an sasán.

“Ita sei jere fatin iha kotuk ne’e ba sira, kada vendedór sei hetan espasu ho medida 4×6 hodi uza fa’an roupa,” Artur Henriques fó sai.

Negosiante husu prepara fatin

Vendedora, Elvira Alves, hateten, sira-nia parte koordena ona ho Governu hodi prepara fatin di’ak nune’e bele halo negósiu hodi sustenta família.

“Ami ba tiha ona Merkadu Maneluana maibé fatin nakonu ne’e oinsá ami bele buka moris, ami hatene planu ne’ebé Governu halo, ami fiar katak sei la halo terus ami maibé ami husu kria kondisaun nune’e ami bele hetan osan hodi sustenta ami-nia moris,” nia dehan.

Jornalista     : Arminda Fonseca

Editora          : Julia Chatarina

 

iklan
iklan

Leave a Reply

iklan
error: Content is protected !!