Autoridade Baucau fó pose membru asembleia postu administrativu
BAUCAU, 22 fevereiru 2024 (TATOLI) – Autoridade Administrasaun Munisipál Baucau, kinta ne’e, realiza serimónia toma pose ba membru asembleia postu administrativu neen iha munisípiu Baucau.
Prezidente Autoridade Munisipál (PAM) Baucau, Veneranda Eurico Marques Lemos Martins, esplika, munisípiu hotu-hotu sempre iha konsellu direberasaun no aprovasaun ba programa hotu ne’ebé kada munisípiu estabelese konsellu tolu hanesan Konsellu Konsultivu Munisipál, Konsellu Koordenasaun Munisipál no Asemblea Postu Administrativu.
“Importánsia tanba levantamentu dadus iha prosesu dezenvolvimentu ba moris di’ak povu nian mai hosi kedas baze,” Prezidente Autoridade Munisipál Baucau hateten iha Sentru Konvensaun Baucau (CCB, sigla portugés) Vila Antiga.
Papél Asemblea Postu Administrativu mak atu rona hafoin prosesu levantamentu hanesan problema sosiál, ekonomia, edukasaun, saúde no infraestrutura antes kontinua iha reuniaun konsellu konsultivu no koordenasaun munisipál hodi sai planu asaun anuál.
Membru asemblea postu administrativu sei envolve hosi xefi suku hotu, veteranu, juventude feto-mane, intelektuál ne’ebé administradór postu administrativu sira mak sei sai prezidente asembleia.
“Komponente ne’ebé boot ne’ebé bele dehan órgaun ida iha baze ne’ebé forte tebes, kaundu aproveita ha’u hanoin dezenvolvimentu sei la’o integradu ho di’ak,” Veneranda Lemos akresenta.
Eis deputada ne’e, argumenta, estrutura asembleia postu administrativu sira tenke nakloke no serbisu ekipa liuliu komunika, koordenasaun planu dezenvolvimentu ba komunidade la’o ho di’ak.
Establesementu asembleia postu administrativu bazeia ba dekretu-lei númeru 84/2023, alterasaun ba dala-lima hosi dekretu-lei númeru 3/2016 ne’ebé iha munisípiu Baucau hamutuk asembleia postu neen hosi 59.
Jornalista : Natalino Belo
Editór : Evaristo Soares Martins
