INFORDEPE no PDH kapasita líder eskola EBC 17 iha Viqueque   

VIQUEQUE, 22 fevereiru 2024 (TATOLI)-Institutu Nasionál  Formasaun  Dosente no Profisionál Edukasaun iha  Timor-Leste (INFORDEPE) hamutuk ho parseiru Programa Dezenvolvimentu Humanu (PDH) oferese kapasitasaun liuhusi Parseria  Apoia Mentoria Lideransa  no Apredijazen (ALMA) kona-ba lideransa ba dirijente husi  ensinu báziku sentrál (EBC-sigla portugés) 17 iha munisípiu  Viqueque.

Kapasitasaun ne’e realiza tanba hetan apoiu fundu husi Governu Austrália no Governu Timor Leste liuhusi Ministériu Edukasaun (ME) hodi  haree ba setór edukasaun liuliu eleva kualidade edukasaun.

“Liuhusi apoiu tékniku ne’ebé maka ami fó bá ME hodi hasa’e kualidade edukasaun. Ho nune’e objetivu edukasaun husi PDH  nian  lases husi planu  dezenvolvimentu edukasaun iha Timor Leste.  Bazeia ba Planu Nasionál Estratéjiku (PNE) 2011-2030 katak eleva kualidade edukasaun”, Reprezentante Agência PDH hodi  Austrália,Anibal  da Costa, hateten iha ninia diskursu abertura formasaun ba líder eskola sira, iha salaun servisu edukasaun munisípiu Viqueque, ohin.

Programa PDH ne’e atu labarik feto no mane  iha ensinu báziku liuliu  siklu I no siklu II  iha kapasidade literasia no  númerasia ne’ebé a’as.

“Ita atu atinje objetivu sira-ne’ebé PDH trasa ba setór edukasaun  liuhusi programa ALMA ne’ebé maka foin lalais ita lansa ona iha postu Uatucarbau. Tan ne’e ohin ita hahú fó formasaun  lideransa nian ba ita-nia direjente eskola sira. Ho nia objetivu lideransa eskola sira bele kompriende kle’an ba programa  ALMA iha eskola sira molok ita implementa ba kada eskola ensinu báziku sira iha munisípiu Viqueque”, Anibal salienta.

Nune’e nia husu,  líder  eskola sira tenke partisipa iha formasaun lideransa ba faze dahuluk tanba importante atu atinje tarjetu hodi jere prosesu ensinu ba alunu sira ho kualidade.

Iha fatin hanesan, Reprezentante hosi INFORDEP, Abilio Soares  Pinto, reforsa governu halo ona kooperasaun ho parseiru sira atu halao  programa ALMA hodi garante kualidade prosesu aprendizajen.

“Ha’u enkoraja  líder eskola sira tenke aproveita formasaun sira-ne’e hodi hasa’e ita-nia koñesementu lideransa nian”, nia sujere.

Entretantu, Diretór Servisu Edukasuan munisípiu Viqueque, Domingos Brandão, sente kontente tanba programa ALMA implementa ona iha munisípiu ne’e.

“Ha’u sente formasaun lideransa ba líder eskola sira ne’e importante no formasaun báziku oinsa ita koñese programa ALMA iha ita-nia eskola no ita hotu-hotu tenke fó kontribui ba programa ida-ne’e iha Viqueque”. Nia subliña.

Entretantu formasaun ba lideransan eskola hamutuk na’in-89 husi EBC 17 iha munisípiu Viqueque inklui mentor na’in-lima no formasaun lideransa ne’e hahú kinta ne’e sei ramata sábadu.

Jornalista : Vitorino Lopes da Costa

Editór       : Florencio Miranda Ximenes